La Universidá va investigar el futuru del oriciu n’Asturies

El Conseyu de Gobiernu d'Asturies aprobó una partida de 80.000 euros pa entamar un conveniu cola Universidá d'Uviéu col oxetivu de que la institución académica investigue les técniques de reproducción del oriciu y ellabore un programa pa la repoblación de los llugares onde esta especie ta cuasimente desaniciada por causa de la sobreesplotación.

El programa, a desarrollar a lo llargo de los próximos años, quier apautar la distribución y situación de los recursos d'oriciu na costa asturiana y, a partir de los datos que se consigan, diseñar una estratexa de xestión racional para llograr una producción sostenible a lo llargo del tiempu.

Pa consiguir estos oxetivos van desarrollase técniques de cultivu de la especie coles que consiguir que críen individuos pa la repoblación y va investigase la dinámica reproductiva de la especie y les estratexes poblacionales poles que se manda. Un siguimientu del comportamientu de los llugares onde se repueble y un estudiu de les posibilidaes de comercialización del productu van completar l'estudiu.