La Universidá va estudiar les foses comunes de la Guerra Civil

El Conseyu de Gobiernu d'Asturies aprobó güei un protocolu de collaboración cola Universidá d'Uviéu pa continuar col trabayu d'identificación de foses comunes y otros llugares d'enterramientu de persones desapaecíes como consecuencia de la Guerra Civil que se desarrolló n'Asturies ente 1936 y 1937. El conveniu, por un importe de 29.685 euros, ye la continuación d'otros dos protocolos anteriores de xunu del añu 2003 y de payares del 2004, y como n'otres ocasiones, va ser el Departamentu d'Historia de la Universidá quien desarrolle'l trabayu d'identificación de foses comunes, analizando tolos conceyos d'Asturies col oxetu d'investigar toles muertes que nun tean esclariaes lo mesmo de la Guerra Civil que d'acciones derivaes d'esta y tamién de les víctimes ensin identificar de la represión qu'hubo n'acabando la Guerra. Los materiales y datos que s'obtengan d'estes campañes d'investigación van entragase nel Archivu
Históricu d'Asturies, onde van constituyir un fondu documental específicu pa la
investigación y testimoniu de la memoria histórico. Convenios anteriores sobre esta materia apautaron tamién creación d'un Centru de Recepción d'Información encargáu de recibir y analizar tolos datos rellacionaos con esti asuntu qu'aporten los ciudadanos y ciudadanes, alministraciones y organizaciones.

L'estáu actual de les investigaciones permíte-yos afirmar a los espertos qu'esisten n'Asturies más de 500 foses comunes, sigún datos de los espertos Emilio Silva y Santiago Macías, autores del llibru "Las fosas comunes de Franco". Munches d'elles tan ensin asitiar esactamente nos mapes y en munchos casos los calabres que guarden tan ensin identificar 70 años dempués de la Guerra. Les foses comunes son testigos de la violencia estrema de la Guerra Civil, siendo ún de los exemplos más apavoriantes de masacre nesta guerra'l de la fosa común del cementeriu d'Uviéu, onde tan enterraos los restos de 1.600 persones executaes, nesti casu identificaes toes elles. L'Asociación pa la Recuperación de la Memoria Histórica calcula que en tol Estáu pue haber cerca de 30.000 persones ensin identificar espardíes per tola xeografía española