La Universidá d'Uviéu va estudiar la contaminación de la incineradora

El Conseyu d'Alministración del Consorciu pa la Xestión de Residuos d'Asturies (COGERSA) dio anuncia ayeri de que diba encargá-y a la Universidá d'Uviéu, al traviés de convenios cola entidá académica, estudios sobre les posibles emisiones contaminantes de la incineradora que tien proyectada COGERSA en Serín y que tien en contra una oposición organizada de partíos políticos, movimientos ecoloxistes y asociaciones vecinales.

Les emisiones de dioxines y otros contaminantes en xeneral van ser el puntu fuerte d'estos estudios, que van entamase a partir del encamientu de la Xunta Xeneral del Principáu de llegar a un consensu social sobre la incineradora. Tamién van incluyise estudios sobre llexislación y normativa existente n'otros países sobre estes instalaciones, proyecciones sobre la contaminación na redolada de la futura incineradora o estudios sobre compostao de residuos pa facer abonu con ello.

D'otra manera, el Conseyu d'Alministración de Cogersa tamién apautó que va avanzase nes inversiones del Plan de Futuru al favor del reciclaxe, enanchando la rede de puntos llimpios, la planta de biometanización y túneles de compostaxe pa materia orgánica y basa y una planta de reciclaxe de basura en bruto. Dientro d'estes midíes va inaugurase esti xueves la planta de compost de Cogersa, que produz abonu agrícola a partir de restos orgánicos.