La Universidá dedica al audiovisual asturianu un cursu de branu que tien en cuenta la cuestión llingüística

Carlos Menéndez Otero y Cristóbal Ruitiña van impartir nel Centru Niemeyer un cursu de branu de la Univesidá de nome ‘El sector audiovisual en Asturias. Una industria cultural en la encrucijada’. Ésti va tener en cuenta la cuestión llingüística.

El cursu, destináu a estudiantes, profesionales del sector y públicu en xeneral, va tener llugar ente'l 10 y el 14 de xunu y ye homologable por creitos de configuración llibre. Na primer xornada, va repasase la historia de la televisión n’Asturies pa depués, dar pasu a Adolfo Camilo Díaz, miembru del conseyu d’administración de la RTPA dende los sos entamos en 2005 hasta 2011, que va esplicar a los alumnos y alumnes cómo nació l’ente de comunicación públicu. Yá pela tarde, va celebrase una mesa redonda sobre la formación audiovisual n’Asturies na que van participar Luis Mario García Bango, Jerome Muñoz Aubry y el propiu Ruitiña. Pela so parte, el martes, Arturo Somoano va falar sobre cómo se programa en televisión, a lo que va siguir una ponencia del direutor xeneral de la TPA, Antonio Virgili, sobre la situación actual de la cadena pública. Tres un descansu pa xintar, va celebrase’l segundu alderique del cursu, nesta ocasión sobre la producción audiovisual asturiana, cola presencia de Jorge Iván Argiz, Azucena López Álvarez, Somoano y el profesor Menéndez Otero.

La llingua asturiana va protagonizar la xornada del miércoles. A primer hora, el profesor de la Universidá d'Uviéu y doctor con una tesis sobre la industria cinematográfica irlandesa, Menéndez Otero, va falar del doblaxe a les llingües autonómiques, a lo que va siguir una charra sobre'l doblaxe n'Asturies d’Illán Gonzali, responsable de Gonzali Producciones, empresa dedicada a tornar al asturianu clásicos del cine. Pela tarde va tener llugar una mesa redonda de nome ‘Llingua asturiana y medios de comunicación’ que va contar cola presencia del periodista y editor Francisco Álvarez, del productor audiovisual Antón García, del profesor y académicu Xosé Antón González Riaño y de Ruitiña, tamién periodista y profesor d’Empresa de Comunicación de la Universidad Camilo José Cela de Madrid.

50 places disponibles

Les dos xornares últimes del cursu van centrase nel cine. Asina, el xueves, Juan Carlos de la Madrid y Menéndez Otero van facer un repasu a la so historia nel país y Azucena López Álvarez, profesora de producción d’ESNE, va falar pela tarde de la producción pa cine, televisión y Internet n’Asturies, asina como de la situación actual de la industria. Por último, el vienres,  Iván Argiz, programador cinematográficu, va centrar la so intervención na programación cinematográfica y nel papel de los festivales y de los centros públicos. Pa finar, va haber una proyeición d’audiovisual asturianu.

‘El sector audiovisual en Asturias. Una industria cultural en la encrucijada’ tien un tope de 50 places y un coste 211,10 euros. Les persones interesaes en participar nesti cursu de branu de la Universidá d’Uviéu tienen de plazu hasta’l 3 de xunu pa formalizar la matrícula.