La Universidá d’Uviéu, sesta entidá en rexistrar el dominiu '.es'

|
El Ministeriu d’Industria, Enerxía y Turismu reconoció a delles instituciones y empreses por ser les primeres n’utilizar, allá pol entamu de la década de los 90, el dominiu ‘.es’. La Universidá d’Uviéu foi la sesta en rexistrase.
 
José Antonio Corrales, anguaño profesor del departamentu d’Informática, encargóse de viaxar a Madrid pa facer la operación. “La mayoría utilizara trés o seis lletres más el ‘.es’, polo que sobre la marcha decidí rexistar ‘uniovi.es’”, direición que tovía emplega la institución académica. Naquel tiempu Internet yera un gran desconocíu pola gran parte de la población, pero daba’l saltu a les universidaes del Estáu que, sicasí, yá utilizaben otros tipos de redes coles sos aplicaciones y, ente otres, el correu electrónicu. “Na Universidá emplegábemos dos redes: EARN/BITNET, mediante protocolos SNA propiedá d’IBM, y HEPNET/SPAN, baxo protocolos DECNET propiedá de Digital Equipment Corporation (DEC)”, señala Corrales, que recuerda que foi en setiembre del 1991 cuando dos persones de FUNDESCO acudieren a la Escuela Téunica Superior d’Inxenieros Industriales –nun esistía tovía la titulación d’Inxenieru Informáticu- y coneutaben la institución a la nomada ‘rede de redes’; pocos años depúes la Universidá d’Uviéu tendría una de les redes metropolitanes de más alta velocidá del mundu. Hai  que destacar que nel momentu del accesu de la institución a Internet yera rector Santiago Gascón, con Guillermo Ojea como vicerrector d’Intraestructures y el propiu Corrales como direutor del Área d’Informática.
 
La ‘World Wide Web’ o ‘www’ qu’ayudó a popularizar Internet a partir del 1993 llegaría poco depués de la mano de Raúl Rivero, que montó un servidor web nel vicerrectoráu d’Estudiantes. Los primeros conteníos yeren cenciellos y ufríen información variada, principalmente pa usu internu. La presencia del asturianu na web llegaría pronto, de la mano d’Óscar Fernández Sierra, que colgara testos de la seición ‘Alitar Asturies’ del diariu ‘El Comercio’ n’otru servidor web del departamentu de Construcción. Col pasu del tiempu, la páxina de la Universidá d’Uviéu foi evolucionando hasta ufrir na actualidá una información completa sobre la institución n’asturianu, castellanu y inglés.
 
La selmana pasada, el ministeriu reconoció la importancia d’aquellos qu’apostaron por incorporase a Internet naquellos primeros tiempos, pa lo qu’utilizaron el dominiu nuevu esistente ‘.es’. La primera foi la entidá xestora del mesmu, NIC, sumándose darréu universidaes, instituciones y empreses. En concreto, la Universidá d’Uviéu foi la sesta en formalizar el rexistru. Nacía asina ‘uniovi.es’. 
 
Na semeya, la web de la Universidá d'Uviéu anguaño.
 
 
Contador Estadistiques