La Universidá d’Uviéu espubliza na web una ‘Guía d’Espertos y Espertes’ pa periodistes y empreses

Los profesionales de los medios de comunicación yá disponen na web de la Universidá d’Uviéu d’una ‘Guía d’Espertos y Espertes’ que va permiti-yos tener accesu a opiniones riguroses sobre temes d’actualidá. 500 profesores participen nesti proyeutu.
 
Esta cifra ye superior a la media d’otres universidaes españolas que punxeron en marcha esta ferramienta de contautu entre espertos y periodistes. Según esplicaron el rector, Vicente Gotor, y la vicerrectora del Campus d’Escelencia Internacional, Paz Suárez Rendueles, hasta la fecha apuntóse na guía’l 25 por cientu de la plantilla del PDI (Personal Docente Investigador) de la institución. Navarra, Burgos, La Laguna, Almería y la Universidad Carlos III de Madrid son les otres universidaes que disponen d’esta guía, común fuera de les llendes del Estáu.
 
Suárez Rendueles resaltó qu’esta ferramiente inclúise dientro d’uno de los pegollos del Campus d’Escelencia Internacional, el relativu a la “implicación col territoriu”. Asina, considera qu’esta ferramienta va permitir a la institución tar más en contautu cola sociedá, dar a conocer a “espertos silenciosos” de la Universidá y demostrar a los asturianos que’l dineru públicu “ta bien emplegáu”. Mentes, Gotor señaló qu’esta ferramienta ye “mui satisfactoria” y que va ser d’utilidá non solo pa los medios de comunicación, sinón tamién pa empreses que busquen contautar con espertos pa collaboraciones puntuales.