La UNESCO refugó la candidatura del patrimoniu inmaterial gallego-portugués

La candidatura conxunta d'instituciones gallegues y portugueses que defendía'l reconocimientu por parte de la UNESCO del patrimoniu inmaterial de Galicia y Portugal como "obra mayestra de la humanidá" y que crió bien de rocea n'Asturies por enxertar como parte del ámbitu d'eses tradiciones y patrimoniu territoriu asturianu ensin contar con instituciones asturianes nin facer referencia nenguna a Asturies, quedó esta mañana en París a piques de pasar la peñera definitiva, sigún adelantó'l diariu dixital gallegu Vieiros .

Ello ye que'l Xuráu de la UNESCO reconoció en total 43 de les 66 candidatures que se-y presentaron esti añu, pero dexó fuera la candidatura conxunta gallego-portuguesa, que contaba col sofitu de les más importantes instituciones de Galicia y Portugal. De cualquier manera, esta candidatura va tener más ocasiones pa volver a presentase, como yá anunciaron que van facer los sos promotores en conociendo la negativa del xuráu, según asoleyó tamién el diariu dixital gallegu Vieiros.

El puntu y aparte pa la candidatura gallego-portuguesa, que xeneró muncha rocea n'Asturies y especialmente n'ámbitos asturianistes, prodúzse dempués de que'l Gobiernu asturianu diere anuncia al traviés de la Conseyería de Cultura, de que va entamase una negociación coles instituciones de Galicia pa remocicar el nome y conteníos de la candidatura a efectos de que se reconoza la participación y les especifidaes asturianes na mesma.