La Unesco crea una biblioteca dixital onde poder consultar documentos de gran valir históricu
|
22 Setiembre, 2011 por Redacción
- Inicie sesión o rexístrese pa espublizar comentarios
La Biblioteca Dixital Mundial de la Unesco nació esti mes con más de 1.200 documentos en llinia que van dir ampliándose de forma progresiva. Esta ferramienta permite consultar testos, grabaos, mapes o semeyes de gran valir históricu.
La iniciativa de la Organización de les Naciones Xuníes pa la Educación, la Ciencia y la Cultura (Unesco, pol so acrónimu n’inglés) foi posible gracies a la collaboración de 32 instituciones que muestren documentos de la so propierdá pela rede pa que persones de tol mundu puedan tener accesu a elles dende cualquier llugar. Asina, los primeros mapas d’América dibuxaos por Diego Gutiérrez pa los reis d’España nel 1562, la Declaración d’Independencia de los Estaos Xuníos, un testu xaponés consideráu por dalgunos como la primer impresión de la historia o unes pintures rupestres africanes que daten del 8.000 enantes de Cristo, son dalgunes de les xoyes y reliquies culturales que los usuarios con conexón a Internet van disponer de baldre a golpe de ratón.
La web de la Biblioteca Dixital Mundial ye de fácil navegación y consulta, yá que tienen distribuyíos los sos documentos por país, fecha, tema, tipo d’artículu y institución. La información de la páxina ta en siete idiomes –castellanu, inglés, chinu, rusu, francés, árabe y portugués– y les imáxenes escaneaes tienen una calidá escelente que permite nun perder detalle cola so ampliación. Nel casu concretu del Estáu español, esta ferramienta permite la posibilidá de contemplar un mapa de la Península Ibérica cedíu pola Biblioteca Nacional de París fecháu nel 1810 que se basa nel trabayu de cartógrafu Tomás López de Vargas, un manuscritu inglés del añu 1589 que muestra los puertos d’A Coruña y Ferrol procedente de la Biblioteca del Congresu de los Estaos Xuníos o un diariu de viaxe de Fernando de Magallanes escritu en francés y fecháu ente 1522 y 1525, que guarda la Yale University y que se piensa que ye obra del italianu Antonio Pigafetta, acompañante del navegante nacíu en Sabrosa (Portugal) nes sos aventures, ente otres munches ayalgues.
Presencia asturiana na Biblioteca del Congresu de los Estaos Xuníos
De momento, nun hai nenguna referencia a Asturies na biblioteca dixital entamada pela Unesco, pero ye destacable la presencia de dellos documentos asturianos nuna de les instituciones que más collaboraron nesta iniciativa: la Library of Congress o Biblioteca del Congresu de los Estaos Xuníos. Asina, tecleando ‘Asturias’ nel so buscador se tien accesu dellos cantares asturianos y cartelos de la Guerra Civil, ente otros documentos d’interés.
Efrén d'Andrés
