La (ultra) derecha barre en Francia

La fola de derechización de la vida política europea llegó ayeri a Francia. Les presidenciales gales, nes que concurríen selce candidatos, acabaron con un resultáu sorprendente y preocupante. Si el trunfu del gaullista Jacques Chirac igual nun ye noticia, la segunda plaza, col 17% del votu, del resucitáu ultraderechista Jean Marie Le Pen, yera daqué colo que naide nun contaba. En conociendo los resultaos, y énte'l plasmu del país enteru, el lider del PSF, Lionel Jospin, que quedó en tercer puestu col 16% del votu, anunció que se retiraba de la vida política y que dexaba toos sos cargos.La mayor abstención dende 1981 nun val sola pa esplicar l'ascensu de la derecha en toles sos espresiones, un ascensu del que se conoz la so auténtica dimensión en viendo qu'ente los candidatos de la ultraderecha sumen más del venti per ciento del votu. El trunfu del discursu demagóxicu y xenófobu contrasta col esfarraple mayúsculu de la "rive gauche". Si Jospin quedaba col 16% Arlette Laguiller, candidata troskista, nun pasaba del 6,5%, mientres l'históricu Partíu Comunista dio un baxón del 8% al 3,4% que cásique lu desanicia de la vida política, un estremu que Le Pen solliñó na so primer apaición pública al conocese los resultaos.L'inesperáu resultáu electoral recibióse nes cais de bien de ciudaes de Francia con manifestaciones de rechazu que nun valdrán pa evitar una segunda vuelta electoral surrealista na que tola izquierda va vese obligada a votar al derechista Jacques Chirac con tal de que Le Pen nun salga presidente de la República. Los periódicos franceses espeyen güei el plasmu popular énte'l resultáu, y Liberation sustitúi la so portada normal por un rotundu "non". El titular más que más se repite nes editoriales de Le Monde, Le figaro o Liberation ye'l de "seismu electoral".