La UE queda sin presupuestu pal 2011

|

La Unión Europea quedó sin presupuestu pal 2011 dempués que la pasada madrugada fracasare l'últimu intentu negociador ente los Ventisiete y la Eurocámara.

La falta d'acuerdu obliga a prorrogar les cuentes del 2010 polo menos mientres los primeros meses del añu qu'entra, lo que podría dexar sin fondos al Serviciu Européu d'Acción Esterior, a les nueves autoridaes de supervisión financiera o al reactor esperimental de fusión termonuclear Iter, según avisó'l comisariu de Presupuestos, Janusz Lewandowski.
  
Los parlamentarios reclamaben de primeres una subida del 6,18% nel presupuestu de la UE pal 2011 al respecto de les cuentes d'esti añu, mientres que la mayoría de Gobiernos consideró esta "subida inaceptable" y pidió llendala al 2,9%, en llinia coles midíes d'austeridá qu'adoptaron los Estaos miembros pa facer frente a la crisis de deuda.
  
Sicasí, la Eurocámara acabó dando marcha atrás nes sos esixencies y aceptó moderar l'aumentu del presupuestu al 2,9%, como pidíen los Gobiernos. Pero a cambiu, pidió tener más poder na negociación del futuru marcu presupuestariu de la UE dempués del 2013 y tamién nos discutinios sobre un posible impuestu européu pa financiar les arques comunitaries.
  
Sicasí, una minoría d'Estaos lideraos por Reinu Uníu y Países Baxos refugaron otra vuelta les demandes de la Eurocámara por considerar que van más allá de lo previsto nel Tratáu de Lisboa. Él provocó la rotura de les negociaciones.
  
"Llamento qu'unos pocos Estaos miembros zarraren la puerta a un acuerdu sobre'l presupuestu del 2011", dixo'l presidente de la Eurocámara, Jerzy Buzek. "La intransixencia d'unos pocos Estaos miembros mina la confianza de los nuesos ciudadanos en que la UE trabaye de forma eficaz", resaltó.
  
Pela so parte, el comisariu de Presupuestos señaló que la falta d'acuerdu ye "mui llamentable" porque "va retrasar la financiación d'importantes iniciatives y inversiones nos Estaos miembros".
  
Nueva propuesta

Agora correspuénde-y a la Comisión presentar una nueva propuesta de presupuestu de la UE pal 2011 pa entamar otra vuelta les negociaciones. Hasta que s'algame un acuerdu, va aplicase'l sistema denomináu "doceavu provisional". Significa que cada capítulu del presupuestu va financiase mensualmente hasta un máximu de la doceava parte de los creitos que se-y conseñaron nel 2010.
  
En tou casu, el presupuestu de la UE pal 2011 incorporóse a l'axenda del conceyu de los xefes d'Estáu y de Gobiernu de la UE que se va celebrar los díes 16 y 17 d'avientu.
 

Contador Estadistiques