La UE dictamina que'l canon de la SGAE ye illegal
|
21 Ochobre, 2010 por E.P. / Redacción
- Inicie sesión o rexístrese pa espublizar comentarios
El Tribunal de Xusticia de la Unión Europea declaró illegal cualquier tipu de canon dixital que s'imponga de manera indiscriminada a tolos equipos y materiales de reproducción.
Sicasí, la sentencia dexa en manes de l'Audiencia Provincial de Barcelona determinar si efectivamente el canon español impónse de manera indiscriminada.
La sentencia refierse al pleitu qu'enfrenta a la Sociedá Xeneral d'Autores (SGAE) cola empresa Padawan, que comercializa dispositivos d'almacenamientu electrónicu, ente otros CD-R, CD-RW, DVD-R y aparatos de MP3.
La SGAE reclamó a Padawan el pagu d'una compensación a tantu alzáu por copia privada por importe de 16.759,25 euros correspondiente a los dispositivos d'almacenamientu comercializaos por Padawan ente setiembre del 2002 y setiembre del 2004.
La llexislación española permite la reproducción pa usu priváu, sin autorización del autor, d'obres yá publicaes. Y establez una retribución a tantu alzáu a favor de los titulares de derechos. A efectos de la mesma grava los equipos, aparatos y materiales de reproducción dixital indiscriminadamente con un canon por copia privada. Los fabricantes, importadores o distribuidores han abonar dichu canon a les entidaes de xestión de los derechos de propiedá intelectual.
El casu acabó ante l'Audiencia Provincial de Barcelona, que preguntó al Tribunal de Xusticia de la UE si'l sistema de gravame español ye conforme cola normativa. L'Audiencia señaló que de la respuesta del Tribunal de Xusticia de la Unión Europea depende'l derechu de la SGAE a reclamar la compensación que correspondería por tolos dispositivos d'almacenamientu comercializaos por Padawan o namás sobre aquéllos que presumiblemente se destinaren a la copia privada.
Efrén d'Andrés
