La UCI recoloca'l Tour en setiembre y tresllada La Vuelta a payares

El percorríu de la carrera ciclista tien programaes dos finales d'etapa n'Asturies.

La Union Cycliste Internationale (UCI) confirmó esta mañana, tres la celebración d'un conceyu telemáticu con organizadores y representantes d'equipos y ciclistes, el calendariu nuevu de pruebes por mor de la pandemia de COVID-19. El Tour, única gran prueba mundial que se calteníen en feches (27 de xunu-19 de xunetu) tres la suspensión del tornéu de tenis de Wimbledon, celebraráse si la situación lo permite del 29 d'agostu al 20 de setiembre.

Esti cambiu afeuta a La Vuelta, prevista del 14 d'agostu al 6 de setiembre, con etapes con finales en L'Altu la Farrapona (29 d'agostu) y L'Angliru (30 d'agostu). La ronda española celebraríase nesti calendariu nuevu depués del Giro, polo que les feches, entovía nun zarraes, llevaránla a payares.

La UCI nun va camudar la fecha de los LXXXVII Campeonato Mundial de Ciclismo en Ruta, con sede esti añu nos cantones suizos de Vaud y Valais, en concreto nes poblaciones d'Aigle y Martigny, de manera respeutiva, del 20 al 27 de setiembre. El Giro, poro, tendría llugar n'ochobre, y, el mes siguiente, La Vuelta.

Na semeya, el direutor de La Vuelta, Javier Guillén, xunto cola viceconseyera de Turismu, Graciela Blanco; l'alcalde de Llaviana, Julio García; l'alcaldesa de Riosa, Ana Díaz; y la diretora de Deporte, Beatriz Álvarez, na presentación de la etapa con salida de La Pola Llaviana y final en L'Angliru en FITUR delantre d'un grafícu col trazáu nel que se pue ver como la organización empieza a incluyir parcialmente la toponimia oficial nes salíes y finales d'etapa asturianes.