La UCE, tamién contra la incineradora de basura

La Unión de Consumidores pidió la dimisión del xerente de COGERSA por afalar la construcción d'una incineradora pa quemar los residuos d'Asturies, que diz que va ser una fábrica de dioxines, y denuncia'l pufu que supón el fechu de que los consumidores paguen nos envases una tasa pol reciclao de los mesmos pa que dempués estos vayan incinerase nun fornu.

La UCE pidió la dimisión de Santiago Fernández, xerente del Ente de residuos COGERSA pol so "fracasu a la hora de llevar alantre'l reciclao intensivo la reutilización d'envases" a lo que s'amesta agora la construcción de la incineradora.

La UCE pide que se copie l'exemplu catalán, onde se recicla'l 90 de los resiuos urbanos y remembra que la UE va prohibir les instalaciones d'incineración nel 2020 porque suponen riesgos pa la salú, sorrayando'l dañu pa la salú pública que pue derivase de la producción de dioxines, "ún de los compuestos químicos más velenosos que se conocen" y de povisa tóxico del fornu. Con esti posicionamientu, la UCE amiéstase a la llarga llista d'organizaciones polítiques y ecoloxistes que se mostraron contraries a la construcción del fornu.