La UABRA yá ta en marcha

La Universidá Asturiana de Branu (UABRA) arrancó’l llunes cola puesta en marcha de los primeros cursos de l’amplia ufierta formativa qu’entama l’Academia de la Llingua Asturiana (ALLA) en Cangas del Narcea. L’alcalde de Santalla d’Ozcos, Marcos Niño, pon esti martes la primer conferencia de les cuatro programaes.

Fernando Padilla, direutor xeneral de Planificación Llingüística y Normalización; Xosé Antón González Riaño, presidente de l’ALLA; Francisco José Borge, vicerrector d’Estensión Universitaria y Proyeición Internacional de la Universidá d’Uviéu; y Laura Álvarez García, teniente d’alcalde de Cangas, presidieron ayeri nel Palacio d’Omaña la inauguración d’esta edición, la novena, de la UABRA. Darréu inauguraben la esposición ‘Día de les Lletres asturianes: El llargu camín de la oficialidá’, que se va poder visitar hasta’l día 10, xornada final de los cursos.

Tamién ayeri los primeros alumnes y alumnos comenzaben les sos clases. A los clásicos, l’elemental y l’avanzáu, que duren dos selmanes, mientres estos cinco primeros díes súmense’l ‘Cursu de Gallego-asturiano (segunda fase)’, y los de ‘Capacitación pa la traducción al asturianu’ baxo la direición de Marta Mori y con profesores como la propia Valdés, Alberto Fernández Costales y Héctor García Gil; y ‘Competencies dixitales na Educación’, supervisáu por David Melendi y col apoyu de Xulio Berros y Fernando de la Fuente, direutor d’Asturies.com, dambos pertenecientes a la ufierta de los ‘Cursos d’Afondamientu Cultural y Llingüísticos’.

Esta tarde tamién van comenzar les actividaes paraleles a los cursos, d’entrada llibre, cola conferencia ‘Desarrollu rural n’Asturies’, a cargu de Niño, nel salón d’actos de la Escuela-Hogar (19 hores). Mañana, a les 22.30 hores, va cantar Carlos Rubiera nel Teatru Toreno.

Na semeya Borge, González Riaño, Padilla y Álvarez García.