La UABRA pieslla la so actividá con un actu na Escuela-Hogar de Cangas

La Universidá Asturiana de Branu (UABRA) pon fin esti vienres a la so actividá con un actu na Escuela-Hogar de Cangas del Narcea. Detrás queden dos selmanes de cursos, charres y conferencies col asturianu como llingua de comunicación.
 
L’actu de pieslle de la UABRA ta previsto pa les 13.45 hores y nél va tar presente José Luis Fontaniella, alcalde de Cangas, persona habitual en toles actividaes entamaes pola Universidá de Branu qu’amosó la so voluntá d’ampliar la collaboración del Conceyu cola Academia de la Llingua Asturiana (ALLA) pa reforzar esta iniciativa. Tamién ta prevista l’asistencia de miembros del Gobiernu asturianu, que na inauguración nun tuvo representación por causa d’una enfermedá del conseyeru de Cultura y Deporte, Emilio Marcos Vallaure, qu’obligó a suspender el so viaxe a Cangas.
 
Dende l’ALLA, institución qu’entama la UABRA en collaboración cola Universidá d’Uviéu y el Conceyu de Cangas del Narcea, coinciden en destacar la so satisfaición col desarrollu d’esta segunda edición de la Universidá de Branu. En declaraciones a Asturies.como feches esta selmana, el so direutor, Xosé Antón González Riaño, señaló que “ta siendo un ésitu total”.