La UABRA entama la so actividá con otru récor de participación

|

Alredor de 170 persones van pasar per Cangas del Narcea dende esti llunes hasta’l 10 d’agostu pa participar na Universidá Asturiana de Branu (UABRA). Actuaciones na Escuela-Hogar permitieron ampliar l’espaciu pa los cursos.
 
“Foi una sorpresa otra vuelta la cantidá de xente matriculao”, destaca Xosé Antón González Riaño, direutor de los cursos de la UABRA, que nun primer momentu contaba con una participación menor por mor de la crisis. “Creo que tamos acertando col plantegamientu de los cursos, porque ye difícil axuntar esi númberu d’alumnos, profesores y participantes”, añade. El total de matriculaos sitúase en 120, elevándose la cifra a 170 si tenemos en cuenta a tola xente participante, lo que supón 20 persones más que l’añu pasáu, cuando’l tope foi de 150. Esto ye posible gracies a delles actuaciones feches na Escuela-Hogar de Cangas que permiten ampliar l’espaciu destináu pa la UABRA.
 
Como ye vezu, los cursos principales d’esta actividá entamada pola Academia de la Llingua Asturiana (ALLA) van ser l’elemental de llingua asturiana y l’avanzáu. Éstos tienen un llargo de dos selmanes (60 hores llectives) y son el xerme d’estos cursos. A ellos, hai que sumar el de capacitación en gallego-asturiano, que principia güei y termina’l vienres (35 hores llectives).
 
Ún de les novedaes que traxo la creación de la UABRA foi l’entamu de los cursos d’afondamientu cultural y llingüísticu, ún de los esitos d’esti formatu que se desendolca dende la so primer edición en Cangas del Narcea, conceyu que collabora de manera activa na so organización, al igual que la Universidá d’Uviéu. Una bona muestra d’ello ye l’alta participación que tienen estos cursos de 33 hores de llargor que busquen averar a los alumnos y alumnes delles temátiques venceyaes cola cultura y la llingua del país. Nuna primer tanda, dende güei al vienres, va celebrase’l de ‘Capacitación pa la traducción al asturianu’ y el de ‘Internet y Escuela. Nueves aplicaciones socioeducatives’. Mentes, la selmana qu’entra, va tener llugar el de ‘Ecoloxía y Mediu Ambiente n’Asturies’ y el de ‘Cantares, bailles ya instrumentos musicales’.
 
La inauguración d’esta edición de la UABRA va celebrase a les 13 hores nel salón d’actos de la Casa de la Cultura Palaciu d’Omaña de Cangas con un actu nel que van tar presentes xunto a González Riaño, la conseyera d’Educación, Cultura y Deporte, Ana González Rodríguez; el vicerrector d’Estención Universitaria, Vicente Domínguez García; la presidenta de l’ALLA, Ana María Cano González; y l'alcalde de Cangas, José Luis Fontaniella Fernández.

 
Actividaes paraleles
 
Al igual que n’años anteriores, la UABRA entama de manera paralela a los cursos delles actividaes que busquen averar la universidá de branu de l’ALLA a la población de Cangas y que, al mesmu tiempu, sirven de complementu a les clases. Ente éstes destaca la esposición ‘Mente y cuerpu. La Universidá d’Uviéu, el deporte y l’olimpismu. L’olimpismu asturianu’, que s’inaugura güei nel Palaciu d’Omaña y que va tar abierta al públicu estes dos selmanes.

 
Otra manera, mañana va principiar el ciclu de conferencies con una mesa redonda alredor de la lliteratura asturiana d’anguaño na que van tomar la pallabra dellos escritores que tán participando na UABRA como profesores. El xueves, Ana Fernández García, profesora titular del departamentu d’Historia del Arte y Musicoloxía de la Universidá d’Uviéu, va falar de ‘La política de patrimoniu n’Asturies’, mentes que, yá pa la selmana próxima, el martes, José Alba Alonso, profesor titular del departamentu d’Economía Aplicada de la Universidá d’Uviéu y especialista n’economía internacional y el desarrollo asociáu colos recursos naturales, amás de vicepresidente de l’Asociación Asturiana d’Amigos de la Naturaleza (ANA), va tratar sobre la ‘Economía y futuru n’Asturies’. Carlos Lastra, presidente d’esti coleutivu ecoloxista, profesor titular del departamentu de Bioloxía d’Organismos y Sistemes de la Universidá d’Uviéu y académicu, va encargase d’impartir la conferencia cabera’l xueves día 9, que lleva’l títulu de ‘Asturies ¿Paraísu Natural?'. Les cuatro intervenciones van entamar a les 19 hores y van tener como sede’l salón d’actos del IES de Cangas del Narcea.
 
No que respeuta al terrén musical, el Teatru Toreno va acoyer dos conciertos que, al igual que’l restu de xeres complementaries a la UABRA, son d’accesu llibre pa tolos ciudadanos. El primeru va tener llugar el miércoles, a partir de les 22.30 hores, y nél los asistentes van poder disfrutar de la voz de Marisa Valle Roso. Mentes, el miércoles día 8, a la mesma hora, ta prevista l’actuación d’Héctor Braga.

Contador Estadistiques