La UABRA afronta la so recta final

El vienres finen los cursos de l'Academia de la Llingua Asturiana en Cangas del Narcea.

Los alumnos y alumnes que participen na Universidá Asturiana de Branu (UABRA) afronten el tramu final de los cursos. En concreto, esta selmana tán desedolcándose l'elemental y l'avanzáu d'asturianu, que principiaren el día 1, y los de ‘Xuegos y tradiciones populares asturianes’, a cargu de Roberto González-Quevedo y  ‘Ecoloxía y Mediu Ambiente n’Asturies’, con Carlos Lastra de maestru, dientro de la estaya de ‘Cursos d’Afondamientu Cultural y Llingüísticu’, que comenzaron el llunes.

De forma paralela, vienen celebrándose estos díes delles xeres complementaries a la UABRA. Asina, el martes Carlos Suari punxo la conferencia 'Señaldá de futuru: xuegu deportivu tradicional, identidá y salú n’Asturies' y ayeri actúo la Banda Gaites LaKadarma. Güei'l turnu va ser pa Xune Elipe, que va falar de 'Rock n’asturianu y la so repercusión na sociedá' de magar les 19 hores nel salón d'actos de la Escuela-Hogar.