La UABRA abre les sos puertes el llunes con 150 participantes

La Universidá Asturiana de Branu (UABRA), qu’entama l’Academia de la Llingua Asturiana (ALLA), abre les sos puertes esti llunes. Per delantre queden dos selmanes de cursos, conferencies, alderiques y otres actividaes alredor de la llingua.
 
Unes 150 persones van tomar parte nos cursos ufiertaos pola UABRA, a los qu’hai que sumar conferenciantes, músicos y otres persones que collaboren nes actividaes que van desendolcase na Escuela-Hogar de Cangas del Narcea. Una cifra importante que nun pue ampliase más pola falta d’espaciu. “Ye sorprendente la respuesta de la xente depués de tantos años”, señala Xosé Antón González Riaño, direutor de la Universidá de Branu, que destaca l’ésitu de los cursos d’afondamientu cultural y llingüísticu.
 
Xente mozo y non tan mozo que busca ampliar conocimientos participen nestos cursos de 33 hores llectives que s’imparten en cinco díes. Los trés primeros, que principien el llunes, son ‘Capacitación pa la traducción al asturianu’, ‘Coses nueves n’Internet. Aplicaciones personales y educatives’, y ‘Xuegos y tradiciones populares asturianes’. Mentes, na segunda tanda, la de la selmana que va del 8 al 12 d’agostu, van dase los cusos de ‘Historia d’Asturies: Nueves perspeutives’ y el ‘Cursu d’aniciu a la investigación toponímica’. “Los que tienen más esitu son los de traducción, xuegos y tradiciones y Internet”, apunta González Riaño, que señala que la mayor parte de los cursos completaron el cupu de venti alumnos y alumnes.
 
Amás d’estos cursos d’afondamientu cultural y llingüísticu, la UABRA, que vive’l so segundu añu d’esistencia como tal, tamién inclúi los tradicionales elemental y avanzáu de llingua asturiana, y el cursu de gallego-asturiano. Hai que destacar que tolos cursos que s’imparten esti añu na UABRA formen parte del programa formativu de la Universidá d’Uviéu, a esceición del de gallego-asturianu, que ta encomendáu pol Gobiernu d’Asturies.
 
Actividaes paraleles
 
La UABRA nun nació col oxetivu de quedase namái en cursos, polo que tamién ufre un ampliu abanicu d’actividaes paraleles colos que tamién busca averase a la población de Cangas del Narcea. Conferencies, alderiques, esposiciones, proyeiciones y actividaes musicales completen una ufierta bayurosa que convierten a esta iniciativa de l’ALLA nun referente cultural. Asina, una de les actividaes programaes pola Universidá de Branu pa estos díes ye una esposición d’humor gráficu protagonizada por tires de Neto, Ernesto García del Castillo, que lleva’l nome de ‘Na punta (la llingua)’. Ésta va tar abierta al públicu na Casa Cultura de Cangas del Narcea dende’l llunes hasta’l 12 d’agostu.
 
Pal martes ta programada la primer de les cuatro conferencies previstes esti añu –toes van celebrase a les 19 hores nel IES de Cangas–, protagonizada por Santiago García-Granda, caderalgu de Química Física y vicerrector d’Investigación de la Universidá d’Uviéu, que va falar sobre ‘Los nanomateriales, una revolución tecnolóxica y un retu pa la Cristolagrafía’. A les 22.30 hores, nel Teatru Toreno, va proyeutase la versión doblada al asturianu del clásicu ‘El tercer home’, trabayu fechu por Gonzali Producciones.
 
El papel de la llingua asturiana na televisión va ser el tema d’una mesa de debate’l miércoles, a les 20 hores nel salón d’actos del IES de Cangas, nel que va participar el direutor xeneral de la RTPA, José Ramón Pérez Ornia, Carlos Suari y Próspero Morán. Un cita interesante que de xuru va atrayer a muncha xente al instituto cangués. Mentes, pal xueves, tán previstes dos actividaes. En primer llugar, va celebrase una conferencia sobre ‘Les races autóctones asturianes. Animales más emblemáticos’, a cargu de Antón Álvarez Sevilla, Llicenciáu en Derechu, miembru de l’Asociación de Criadores de Ponis de la Raza Asturcón (ACPRA) y del Coleutivu d’Estudios Etnográficos Belenos. Yá pela nueche, a les 22.30 hores nel Teatru Toreno, va actuar el grupu folk llocal Brandal.
 
Pa pesllar la primer selmana d’actividaes paraleles de la UABRA, el vienres va tener llugar un alderique baxo’l nome ‘Indignaos o encesos. Causes y consecuencies del descontentu social’, nel que participen Santiago Fano y otros activistes del nomáu movimientu 15-M. Yá pa la selmana siguiente, tán previstes dos conferencies más tamién mui interesantes. El llunes, Francisco José Llera Ramo, caderalgu de Ciencia Política de la Euskal Herriko Unibertsitatea, direutor del Euskobarómetru, númberariu de l’ALLA y autor de dellos estudios sociollingüísticos sobre l’asturianu, va tratar sobre’l tema ‘Asturies: ente la complexidá presente y el futuru inciertu’, mentes que’l miércoles, la profesora d’Eduación Secundaria, escritora y numberaria de l’ALLA, Berta Piñán, va falar de ‘La lliteratura asturiana güei’.