La UABRA abre esti llunes la so segunda selmana d’actividá

Esti llunes abrióse la segunda selmana d’actividá de la Universidá Asturiana de Branu (UABRA) que ta celebrándose en Cangas del Narcea. Dos cursos nuevos d’afondamientu cultural y llingüísticu principiaron a impartise.
 
Éstos son ‘Historia d’Asturies: Nueves perspeutives’ y el ‘Cursu d’aniciu a la investigación toponímica’, que completen los cinco cursos d’esta estaya que la UABRA ufierta nesta segunda edición de l’actividá entamada pola Academia de la Llingua Asturiana (ALLA) en collaboración cola Universidá d’Uviéu y el Conceyu de Cangas del Narcea. La selmana pasada impartiéronse los cursos ‘Capacitación pa la traducción al asturianu’, ‘Coses nueves n’Internet. Aplicaciones personales y educatives’, y ‘Xuegos y tradiciones populares asturianes’. D’igual forma, continúen les clases d’asturianu de nivel elemental y avanzáu, y el de gallego-asturiano.
 
No que respeuta a les actividaes paraleles de la UABRA, pa este tarde taba prevista una de les conferencies más esperaes, la Francisco José Llera Ramo, caderalgu de Ciencia Política de la Euskal Herriko Unibertsitatea, direutor del Euskobarómetru, númberariu de l’ALLA y autor de dellos estudios sociollingüísticos sobre l’asturianu. Nella, Llera Ramo diba falar sobre ‘Asturies: ente la complexidá presente y el futuru inciertu’. Mentes, pal miércoles, a les 19 hores nel IES de Cangas, va celebrase la cuarta y cabera conferencia d’esta edición de la Universidá de Branu, que va protagonizar la profesora d’Eduación Secundaria, escritora y numberaria de l’ALLA, Berta Piñán. Ésta lleva por nome ‘La lliteratura asturiana güei’.