La TV Autonómica y la Universidá Llaboral tomen les cuentes de Cultura pal 2006

Como yá s'anunciare nel so momentu, la TV autonómica va llevar nel exerciciu 2006 un total de 17,4 millones de euros con cargu a les cuentes de la Conseyería de Cultura. Sicasí, el proyectu estrella de la Conseyería qe dirixe Ana Rosa Migoya nun va ser el proyectu que consuma más recursos de l'alministración, y ello ye que'l remocique de la Universidá Llaboral, l'edificiu que va atechar l'ente públicu va precisar de 37 millones d'euros, una cantidá que va valir pa preparar les instalaciones de la TV autonómica y tamién el Centru d'Artes Escéniques, un centru integráu de formación profesional y el centru d'arte nun de los proyectos más cacarexaos del executivu pa esta llexislatura.

Ente la Llaboral y la TV van consumir ún de cada trés euros de los más de 160 millones que va remanar Cultura nel 2006, un 52% más que nel 2005. El tercer proyectu inversor que va contar con mayor financiación pal 2006 va ser el de la estación d'esquí "Fuentes de Invierno" na fastera del ayerán Puirtu Braña. 6,9 millones d'euros de les cuentes de Cultura del 2007 van dir empobinaos a la preparación de les pistes, remontes y l'edificiu central de la estación, que se quier que tea funcionando pal 2007.

La conservación del patrimoniu, con un presupuestu total de 9'3 millones d'euros, supón otra de les partíes presupuestaries más grandes fuera yá del capítulu inversor, neto que los presupustos de la Orquesta Sinfónica del Principáu, que cuena con 4,9 millones d'euros. En cuantes a la estaya de museos, l'ampliación del de Belles Artes, cuenta con 1'82 millones d'euros, el Parque Históricu del Navia 1'64 y el Plan Prehistóricu del Oriente 1'13. Como yá adelantare ayeri Asturies.com, les cuentes de la Oficina de Política Llingüística van llegar nesti exerciciu 2006 a los 2 millones d'euros, una xuba de cerca del 20%.