La TV autonómica va tresmitir partíos de fútbol

L'Ente Autonómicu de Comunicación comunicó ayeri que'l so ingresu na FORTA va llevar arreyada la tresmisión en directo de los partíos de fútbol que xueguen los equipos asturianos. Ello va beneficiar a los siguidores del Sporting de Xixón de segunda división y tamién a los del Real Uviéu y Marino de Lluanco, equipos asturianos de la Segunda División "B" que yá teníen apautada la tresmisión de los sos alcuentros. El primer partíu que va tresmitir la tv autonómica va ser el Racing de Ferrol-Sporting que va xugase'l 7 de xineru en campu gallegu de A Malata a les 18:30h, pa, darréu, el día 8, facer otru tantu col Marino de Lluanco -Cultural de Durango, que se xuega a les 6 de la tarde. Una selmana después, el domingu día 15, va tresmitise l'alcuentru ente'l Real Uviéu y l'Irún en estadiu Carlos Tartiere.

Uviéu y Marino van recibir 30.000 euros en conceptu de drechos de tresmisión polo que queda de temporada y una cantidá amestada por cada partíu que se tresmita, que pue variar acordies colos índices d'audiencia. Otramiente, el Sporting, que tien vendíos a la empresa Audiovisual Sport los sos derechos, nun va recibir perres de la TV autonómica pero sí va cobrar un plus de la FORTA. L'equipu de Xixón tien apautaes 16 tresmisiones nesta lliga pela FORTA ente partíos en casa y fuera, llevando yá feches trés, mientres que nel casu de Real Uviéu y Marino namás van tresmitise los partíos en casa y siempre que caigan de domingu.