La TV autonómica va tresmitir en directo al Sporting dende Murcia

La Televisión Autonómica d'Asturies (RTPA) va facer el día 21 de xineru la so primer producción fuera d'Asturies, tresmitiendo en directo'l partíu que van xugar en Murcia'l Sporting de Xixón y el Murcia, según-y dio parte ayeri la RTPA al organismu federativu de les radiotelevisiones autonómiques, la FORTA. Da la casualidá que la comunidá murciana tien tamién una televisión autonómica creada apocayá, pero esta inda nun ta operativa.

Cola anuncia de la tresmisión d'esti partíu, la RTPA centra la so atención y medios nel fútbol, productu televisivu de primer interés pal públicu asturianu nun intentu por facer más popular la señal de la RTPA y llamar a los espectadores a sintonizar l'autonómica nos sos aparatos. Ello faise con especial siguimientu a la segunda división, categoría que de mano la RTPA anunciare al traviés del so director José Ramón Pérez Ornia que nun diba cubrir por nun poder asumir l'Ente'l gastu de cerca de trés millones d'euros que suponía'l paquete de fútbol de la FORTA. El pasáu día 7, l'autonómica asturiana, que ta tresmitiendo en fase de prebes, conectóse a la señal de la TV gallega pa tresmitir el partíu ente Racing de Ferrol y Sporting de Xixón, mientres qu'esti fin de selmana la canal pública asturiana fexo la so primer tresmisión con medios propios pa cubrir en directo'l trunfu en casa del Marino de Lluanco énte'l Durango. Pa esti fin de selmana, la señal en prebes de la RTPA va dar el partíu del Real Uviéu col Irún en Carlos Tartiere, una tresmisión a la qu'hai qu'amestar agora la del Sporting de Xixón fuera de casa.