La TV autonómica fexo la so primer emisión en prebes

La Radio Televisión Autonómica del Principáu Asturies (RTPA) fexo ayeri la so puesta de llargo con un actu especial que se tresmitió en directo dende les sos instalaciones provisionales nel Parque Tecnolóxicu de Xixón, y al qu'asistieron más de 300 personalidaes de la cultura y la política d'Asturies.

Un videu musical, encargu de de la RPTA a la Productora de Programes del Principáu y realizáu por José Braña, nel qu'artistes del pop y del rock asturianos faen una versión del himnu d'asturies foi la primer emisión de la RPTA, que s'estrenó ayeri en sociedá. Peles imáxenes desfilaron ente otros músicos como'l guitarrista y compositor Igor Pascual (Trogloditas), Jorge Martínez d'Ilegales, Jorge Otero del grupu Stormy Mondays o la cantante de The Real McCoyson , interpretando una versión en castellanu del "Asturies Patria Querida" na qu'intervenía un intre Ramón Blanco, cantante del grupu "Los Berrones" faciendo n'asturianu una parte del himnu.

Enantes de la emisión del videu foi l'actu oficial d'estrena en sociedá de la RTPA, nel qu'intervinieron el presidente del Ente José Ramón Perez Ornia, la conseyera de Cultura Ana Rosa Migoya y el Presidente asturianu Vicente Álvarez Areces. La intervención del primeru foi la más sorprendente y la qu'aportó más datos, anque pocos de cualquier manera, sobre'l presente y futuru inmediatos de la RTPA. Ornia anunció que dende aquel momentu entamaben les emisiones en prebes de la RTPA, siendo'l mesmu actu que taba celebrándose la primer retresmisión en directo del acabante ñacer Ente Autonómicu de Comunicación. El director del Ente cuidóse d'apuntar una fecha definitiva pal entamu de les emisiones n'abierto, falando d'un plazu abiertu de "pocos meses" anque apuntando a la primavera. Pela so parte, Vicente Álvarez Areces refirióse a la xornada como un "día feliz"" que llevaba "tantu tiempu esperando" y presentó la RTPA como "un proyectu que cuenta col apoyu de la mayoría de los asturianos" y un "símbolu de modernidá que va fomentar la economía y l'emplegu nel sector audiovisual". El Presidente d'Asturies sorrayó lo "rigoroso y tresparente" de tol procesu de contrataciones y oposiciones, y prometió que los informativos de la RTPA diben ser "plurales y neutrales". Esta foi la única referencia a la programación de la RTPA, en cuantes que Ornia nun dio adelantu nengún sobre cómo va iguase la parrilla de programación de la TV nin tampoco de la programación en llingua asturiana qu'ésta pueda inxertar. Asina l'asturianu nun tuvo presente en nengún de los discursos de los responsable del Ente de comunicación.

Al actu asistió la plana mayor del executivu asturianu, xunta d'otros munchos conseyeros, alcaldes y cargos socialistes, ente ellos el Conseyeru d'Educación José Luis Iglesias Riopedre o'l diputáu socialista Fernando Lastra o la presidenta de la Xunta Xeneral María José Ramos. El tamién socialista y Delegáu del Gobiernu Antonio Trevín asistió igualmente al actu, neto que fixeron representantes del mundu empresarial encabezaos pol presidente de la Federación Asturiana d'Empresarios (FADE) Severino García Vigón, Roberto Paraja, presidente de Telecable, o'l xerente de la Productora de Programes del Principáu Francisco G. Orejas. Les mayores ausencies al actu vinieron de la mano de los cabezaleros del PP y los d'Izquierda Xunida - Bloque, anque'l representante d'esta formación política en Conseyu d'Alministración na RTPA Adolfo Camilo Díaz sí asistió a la puesta de llargo de la RTPA acompañáu del Director de Política Llingüística Ramón d'Andrés. El director del Festival Internacional de Cine de Xixón José Luis Cienfuegos fue otros de los asistentes al actu, que s'espurrió más de dos hores.