La TV andaluza defende la fala

Mientres n'Asturies l'asuntu de la presencia de la llingua asturiana na futura TV autonómica ye ún de los debates más enraxonaos dientro l'asturianismu, y cuando la Llei que va regular la TV autonómica nun diz un res sobre l'asuntu amosando la falta d'interés gubernamental por regulalo, dende Andalucía lléganos una anuncia que de xuro va sorprender a más d'ún.

Ello ye que la Televisión Autonómica Andaluza, una de les más antigües que funcionen nel estáu, ta acabante d'echar a andar una campaña que, baxo'l títulu "Fala andaluz siempre" convida a la xente a espresase na fala de la tierra "la forma normal en que los andaluces falamos l'español" al través de los testimonios de seyes andaluces famosos qu'afirmen que "Soi andaluz y falo como se fala n'Andalucía: n'andaluz" un lema col qu'intenten desaniciar la idea de que lo andaluz ye falar mal o que ye una cosa graciosa. Los anuncios d'esta campaña (de tv y cuñes de radio) van pasase sistemáticamente per Canal Sur Televisión, Canal 2 Andalucía, Andalucía Televisión (emisión vía satélite) Canal Sur Radio, Radio Andalucía Información y Canal Fiesta Radio.