La tresmisión sigue a la baxa: 6 casos esti llunes

Per tercer día nun se rexistren finaos.

A falta de la espublización de los datos, la Conseyería de Salú comunicó la detección de 6 positivos, 1 menos que la xornada anterior. La tasa de positividá diaria, con 2.179 pruebes de diagnósticu d'infeición activa, asitióse nel 0,55 por cientu, cuando esti porcentaxe a 7 díes yera'l domingu del 0,89 por cientu –ayeri baxó al 0,72 por cientu–.

Nun hebo que llamentar muertes cola enfermedá causada pol coronavirus SARS-CoV-2, polo que'l total nel andanciu caltiénse en 2.069. Dende'l vienres nun se rexistren finaos.

12 pacientes tán hospitalizaos en planta con confirmación o sospecha de COVID-19, 4 menos que'l domingu. Mentes, siguen otres 6 persones ingresaes na UCI.

Na semeya, la unidá móvil de vacunación el mes pasáu nel campus d'El Milán de la Universidá d'Uviéu.