La tradición y la vanguardia danse la mano nel festival ‘Folk, Post-folk’

Esta fin de selmana y la siguiente van entamase esposiciones, conciertos, actos lliterarios y conferencies nel festival multidisciplinar ‘Folk, Post-folk’ con cinco sedes nel conceyu de Llanes. Tradición y vanguardia danse la mano nesta iniciativa nueva de baldre.

El Muséu Etnográficu del Oriente d’Asturies acueye les primeres actividaes del certame. A les 17 hores Ricardo Villoria va facer una visita guiada a la so esposición 'RCTA (Reinterpretación de la Cultura Tradicional Asturiana)', que se va poder visitar hasta'l 31 de xunetu, y a les 18 hores Leticia Baselgas va poner la charra ‘Ente’l punk y les ruxideres’ enantes de dar un conciertu con Calea, la banda que conforma xunto con Silvia Quesada y Rubén Bada. La Casa Cultura de Llanes va acoyer el siguiente eventu, yá de nueche, a les 22 hores, una sesión de tecno-asturianada con Paganéu Live.

Mañana, a les 19 hores na Casa Cultura, El Vecro, esto ye, Pablo X. Suárez y Dudu García, ufren ‘Electro Rapsodia’, mentes qu’a les 21 hores va actuar La Maramoniz cola so música tradicional non tradicional. Esti conciertu va tener como sede’l Casinu de Llanes.

El Sablón y Celoriu

La selmana próxima’l festival ‘Folk, Post-folk’ va desplazase al parque d’El Sablón, onde va actuar Burbús a les 19.30 hores. El sábadu, a les 11 hores, la Orquesta Céltica Asturiana va ufrir el conciertu didáuticu ‘Músiques del Camín’ y, yá de tarde, a les 19.30 hores nel salón d’actos de la Casa Cultura, Llorián García va desendolcar la idea ‘La falta de cuchu’.

Va encargase de poner el ramu al certame, entamáu pola Casa Municipal de Cultura de Llanes en collaboración col Muséu Etnográficu del Oriente y la financiación de ‘Asturies, Cultura en Rede’, Felpeyu’l domingu a les 19.30 hores n’El Sablón. Toles actividaes son d’entrada llibre hasta completar aforu.

Na semeya, una imaxe de la esposición 'RCTA' de Villoria.