La TPA va emitir el domingu’l conciertu especial ‘Llume' de Xera

El 14 de xunetu’l grupu de folk-electrónicu Xera presentaba con un conciertu especial nel Centru Niemeyer el so tercer discu, ‘Llume’. L’espectáculu, de más d’una hora de duración, va poder vese’l domingu pela TPA.

"‘Llume’ representa una evolución de la humanidá entamando dende un aspeutu más antropolóxicu –ñacimientu y evolución d’una especie– hasta’l más metafísicu –evolución espiritual–. Los estadios d’evolución diferentes son representaos al traviés de los sones y xúnense pela voz d’una neña, cuya evolución veremos desendolcase a midida que trescuerre l’espectáculu. La ‘Llume’ representa l’elementu de cambiu que toos y toes llevamos dientru y que nos emburria a camudalo too”, esplica la banda nun comunicáu.  Hai que destacar qu’esti espectáculu foi’l primeru que se desendolcó n’Astruries en soníu 5.1.

Xunto a la formación actual de Xera, participaron nesti conciertu’l grupo coral Los Peques del León de Oro, la Banda de Gaites La Raitana y el grupu de batucada Matu na Cai.  Les persones que nun pudieron asistir nel so día al Niemeyer, agora van poder disfrutar del conciertu pela TPA, cadena que va emitilu’l domingu a les 17.15 hores.