“La TPA confunde'l formatu de programa pa neños col d'ún onde salen neños”, asegura la XDLA

La XDLA señala como “nefasta” la xestión de la direutiva nueva de la TPA. “La programación ta cada día más alloñada de la idiosincrasia asturiana, lo que se traduz en menos audiencia”, yá perbaxo del 5 por cientu, y reclama una programación infantil de verdá.

El coleutivu cívicu llamenta que la esperiencia vivida na Selmana de les Lletres Asturianes, onde “los y les televidentes pudimos ver una televisión pública más comprometida cola realidá llingüística d'esti país”, con películes, partíos de fútbol, progames especiales sobre la lliteratura fecha por muyeres y noticies n'asturianu, “anque nesti últimu casu fora namás pa informar sobre la propia llingua”, quedará pal escaezu una vegada finada esta celebración. “Volvemos tener una televisión que dexa de llau la cultura y la llingua de la nuestra tierra y, con ello, a nós, los asturianos y asturianes, que somos la so audiencia potencial”, apunta la Xunta pola Defensa de la Llingua Asturiana (XDLA).

Nesi sen, destaca que “nos últimos díes estrenáronse programes nuevos en TPA que tienen el castellanu como idioma vehicular. Espacios qu'amás nun tán contando col siguimientu del públicu –dalgún nun llega al 1 por cientu–, lo que muestra la incapacidá de los xestores de la cadena –los vieyos y los nuevos– pa dirixir TPA. Una direutiva que día tres día da exemplu de los sos conocimientos nulos sobre Asturies y sobre televisión, pero que perciben por ello unos sueldos millonarios”. Asina, pon como prueba les cifres d’audiencia, “que yá nun lleguen al 5 por cientu y que la asitien per debaxo de toles cadenes xeneralistes que se puen sintonizar nel nuestru país”.

La estrena de ‘Fálame’ nun acaba tampoco de solucionar el problema de la falta de programación infantil na canal pública. “Nuna muestra más de los sos nulos conocimientos sobre televisión, la direutiva de TPA confunde'l formatu de programa pa neños col d'un programa onde salen neños. Dende la XDLA allegrámonos de la estrena de cualquier espaciu n'asturianu –sía cual sía'l formatu, siempre va ser necesariu–, pero programación infantil n'asturianu ye series de dibuxos, xuegos, cantares y entretenimientu pa neños y neñes n'asturianu. Yá nos ochenta, a TVE nun se-y ocurrió vender ‘Juego de niños’ como un programa infantil, porque nun lo yera. Val con saber con un poco de televisión pa dase cuenta...”.

Situación más llaceriosa na RPA

Si la situación ye mala na TPA, “nel casu de la RPA la situación ye tovía peor”. Según esplica la XDLA, a últimos del añu pasáu estrenáronse tres formatos n'asturianu, “pero éstos nun siguieron nel 2017. Nun parez que fora por falta de presupuestu, porque los programes en castellanu siguen ehí y, mesmamente, estos díes la radio pública estrena dos programes nuevos col castellanu como idioma vehicular. Una situación que rebaxa'l yá en por sí alarmante porcentaxe del 2 por cientu, que ye lo que RPA taba emitiendo hasta'l momentu nel nuestru idioma”.

Tampoco nun hai presencia de música asturiana na programación de la canal pública, lo que tamién ayuda a que “l'audiencia nun s'identifique con una radio que diz ser asturiana, pero que nengún radioyente pue identificar como talo. La prueba ta na so audiencia tan probe”.

Por too ello, la XDLA “pide responsabilidaes al equipu direutivu de RTPA y a los representantes públicos asturianos; los mesmos que firmaron un alcuerdu d'investidura y un plan de dignificación del asturianu que fala d'aumentar el porcentaxe d'emisión n'asturianu, los mesmos que pactaron el nomamientu d'Antonio Virgili y que repartieron los puestos directivos de la cadena. Valió yá de xustificar la marxinación a la que someten a la nuestra cultura y les audiencies irrisories con que RTPA ye una de les radiotelevisiones autonómiques con menos presupuestu. Si hai presupuestu pa facer programes en castellanu de calidá duldosa, mercar telenoveles estranxeres que naide ve y duplicar el númberu de directivos, tamién hai presupuestu pa facer programes n'asturianu, pa contratar conteníos a les productores pequeñes y pa facer surdir asina un sector audiovisual asturianu competitivu. Lo d'agora ye un duernu pa cuatro, un duernu que pagamos toos y toes y que sufrimos día tres día –los que tovía tenemos gracia pa sintonizar la canal–”.