La toponimia tradicional de Tinéu yá ye oficial

|
Tinéu

El BOPA d’esti martes espublizó’l decretu pol que los topónimos tradicionales de Tinéu pasen a ser los oficiales del conceyu. D’esta forma, los nomes de llugar Tinéu, Xinestaza y Bustieḷḷu sustitúin a los castellanizaos Tineo, Ginestaza y Bustiello, ente otros.

Tres l’aprobación el pasáu día 11 por parte del Conseyu de Gobiernu del espediente ellaboráu pola Xunta de Toponimia, que pasara enantes pol Plenu municipal, namái quedaba’l trámite d’espublizar dichu documentu nel Boletín Oficial del Principáu d’Asturies (BOPA) pa que la toponimia tradicional del conceyu pasara a ser la oficial, siguiendo lo estipulao pola Llei de Promoción y Usu del Bable/Asturianu del 1998. Ésti asoleyábase güei, polo que Tinéu pasa a ser la denominación única de la capital, refugándose asina una denominación billingüe que s’escoyera en dellos conceyos del país como Xixón, Llangréu o Bual

Tamién ven modificáu’l so nome oficial numberoses parroquies y aldees cuartanes. Asina, ente les primeres, El Baradal pasa a ser Campucaldera; La Barca, Soutu; Bárcena del Monasterio, Bárzana; Borres, Bourres; Brañalonga, Brañaḷḷonga; Bustiello, Bustieḷḷu; Calleras, Caeras; Cerredo, Santiáu; Collada, Coḷḷada; Genestaza, Xinestaza; Merillés, Merías; Miño, Santolaya de Miñu; Obona, Oubona; La Pereda, La Preda; Ponte, Santuyanu; Relamiego, San Estaban de Reḷḷamiegu; Rellanos, Reḷḷanos; San Facundo, San Fagondu; San Félix, San Fliz; San Fructuoso, San Frichosu; San Martín de Semproniana, Samartín de Semproniana; Sangoñedo, Sangoñéu; Santa Eulalia, Santoyala; Sobrado, Sobráu; Tablado, Tabláu; Troncedo, Troncéu; y Villatresmil, Viḷḷatresmil.

Esta aprobación, que suma la 55 de los 78 conceyos asturianos, llega pocos díes depués de la Candamu, mentes que se ta a la espera de que se dea lluz verde a los decretos de Peñamellera Alta y Tapia. Otra manera, Cabrales, Llanera, Castropol, Cuaña, Les Regueres, Onís, Somiedu y Sotu’l Barcu tán en fase avanzada.

AdxuntuTamañu
PDF icon Toponimia oficial de Tinéu1.31 MB
Contador Estadistiques