La territorialidá asturiana, tema d’alderique de la Tertulia Enrique García-Rendueles

|

Esti xueves, a les 20 hores en L’Ayalga, va celebrase un alderique de la recién estrenada Tertulia Enrique García-Rendueles. Nesta ocasión va falase de la territorialidá asturiana, pa lo que ta convidáu l’escritor Xaviel Vilareyo.
 
El mierense, autor del llibru ‘Los ámbitos de la nación asturiana’, va principiar l’alderique con una esposición del procesu pol que pasó la nomada provincia d’Uviéu a convertise n’Asturies y los recortes territoriales que se fixeron dende Madrid. Depués va tratase esti tema ente tolos presentes. La participación na tertulia, qu’entama N’Ast y l’Atenéu Cultural Xuan María Acebal, ye abierta a tol mundu.
 
Otra manera, N’Ast ta acabante d’asoleyar un comunicáu nel que muestren el so sofitu a la Federación Asturiana de Bolos tres los recortes presupuestarios de la Direición de Deportes, que podría ascender a unos 14.000 euros. Dende l’asociación N’Ast sospechen que tres l’actitú del Gobiernu ta’l resquemor pola salida de l’asturiana de la Federación Española de Bolos.

Contador Estadistiques