La temporada d’esquí echó a andar en tiempu en Fuentes de Invierno, mentes que Valgrande-Payares nun pudo abrir

|
Fuentes de Invierno

Per primer vegada n’años, los aficionaos pudieron disfrutar de la nieve na fecha marcada pa l’apertura de la temporada d’esquí. Pa ello tuvieron que dir a Fuentes de Invierno, yá que Valgrande-Payares, qu’acoyó protestes, nun pudo abrir la parte baxa de la estación el sábadu, como taba previsto, pol agua cayida de nueche.

Más de 2.047 usuarios fixeron usu esta fin de selmana de Fuentes de Invierno. La estación ta abierta al completu, con nieve cayendo anguaño y un espesor mínimu de 30 centímetros y máximu de 130, lo que permite esquiar los sos 8,76 quilómetros de pistes.

Mentes, Valgrande-Payares sigue trancada. L’agua que cayó na madrugada del sábadu impidió que se pudiera abrir la parte baxa de la estación, como anunciaren dende la Direición Xeneral de Deporte, por falta de nieve, dalgo que se pue solucionar pa estos díes gracies a la que ta cubriendo’l cordal güei.

Mentes, la parte alta nun va poder usase hasta que la empresa esterna contratada nun concluya la revisión de la telesiella de Brañiḷḷín, retrasada por un contratiempu alministrativu, según confirmó la conseyera Berta Piñán. “Ye un tema de seguridá y la seguridá ta perriba de cualquier otra consideración”, señaló’l llunes pasáu.

Reclamación d’inversiones en Valgrande-Payares

El retrasu de l’apeturta de Valgrande-Payares llevó a la convocatoria d’un actu de protesta’l sábadu frente a la cafetería de la estación baxo’l lema de ‘Inversiones ya’. Delles decenes de persones acudieron a la llamada pa reclamar unes actuaciones que consideren fundamentales pa garantizar el futuru de la instalación.

Na imaxe, Fuentes de Invierno na xornada d'ayeri. Semeya propiedá de la Estación Invernal Fuentes de Invierno.

Contador Estadistiques