La Televisión autonómica va entamar a emitir nel mes de mayu

La Televisión autonómica asturiana va entamar les sos emisiones a primeros del mes de mayu, según dio anuncia a ayeri'l director del Ente José Ramón Pérez Ornia. El directivu del Ente compareció na Comisión de Control de la Xunta Xeneral del Principáu a pidimientu del Partíu Popular pa dar parte de los conteníos que va tener esta emisión, que va ser de mano de doce hores diaries "de calter informativu y de serviciu públicu" que "aspira a estremase de les demás canales y non a competir con elles".

Ornia afitóse na idega que yá espunxere n'otres ocasiones de que l'autonómica va ser una "canal temática d'Asturies" y esplicó que la emisora va tener 4.380 hores de programación al añu de les que'l 75% van producise n'Asturies. La parrilla de programación va encadarmase alredor d'un nucleu estable con conteníos d'actualidá que van emitise a lo llargo de tol día, mientres que los informativos, de 45 minutos caún, van ser trés y van emitise al mediudía, pela tarde y pela nueche, amestándose-yos un espaciu de deportes.

La programación total d'informativos va ser de 730 hores al añu, y pa cubriles l'ente va tener que facer 12.804 noticies, de les que 9.700 van ellaborase pola so redacción y les nueve corresponsalíes nos conceyos -de les que 8 van tar al cargu de la editorial del diariu El Comercio- y sobre 400 van venir de la delegación de la RTPA en Madrid, esternalizada al grupu Telefónica.

Na programación de la tarde va inxertase sobre les 18 hores l'espaciu infantil, que va correr al cargu de la empresa Médula Producciones. Darréu d'ello va venir un espaciu qu'Ornia definió como "Asturias Directo" que va durar de mano una hora y que va espurrise hasta la hora y media dempués de delles emisiones. Pa pela nueche, la directiva de la RTPA ta estudiando programar un espaciu diariu de conteníos "más desenfadaos" pero siempre culturales "non como los de les canales de TV más comerciales". D'otra manera, va facese una emisión especial al mes de trés hores de duración dedicaes monográficamente a ún conceyu d'Asturies.

Otramiente, Ornia aclarió que dende güei la RTPA va pasar a ocupar los locales que tien cedíos en monesteriu de les Clarises de la Universidá Llaboral, pero esplicó que-y van pidir al Gobiernu que caltenga la cesión del edificiu que se mercó a costafecha p'agospiar a la TV en Parque Tecnolóxicu de Xixón.

El portavoz del PP, Fernando Goñi sorrayó que los datos qu'apurrió Ornia amuesen que la TV "tien esternalizada cuasimente tola so producción, colo que nun se sabe au ta la so capacidá de producción propio".