La tasa de positividá de COVID-19 estabilízase al rodiu'l 5 por cientu

El martes rexistráronse 236 casos nuevos y hai que llamentar un total de 15 muertes.

La Conseyería de Salú informó de 236 contaxos ayeri, que los datos oficiales aumenten nun casu más, que correspuende a díes anteriores, y pon el total de la serie en 23.484. Supón un aumentu de 91 con respeuto al llunes nuna xornada na que se fixeron 1.877 pruebes PCR más que'l día anterior.

La tasa de positividá antayeri foi del 4,47 por cientu, mentes que na comunicación última asitióse nel 5,18 por cientu tres les 6.669 pruebes feches. Hai una selmana esti porcentaxe ascendió a un 7,28, mentes que nos díes últimos estabilizóse al rodiu del 5 por cientu que marca la Organización Mundial de la Salú (OMS) como llende pa tener controlada la pandemia.

Na xornada hai que llamentar 15 muertes: ocho muyeres de 94, 92, 92, 89, 81, 76, 74 y 58 años, y siete homes de 95, 90, 89, 87, 87, 81 y 51, de los siete vivíen en residencies de mayores. Un total de 1.038 persones finaron cola enfermedá causada pol coronavirus SARS-CoV-2 no que va del andanciu.

Hai hospitalizaos 695 pacientes con confirmación o sospecha de COVID-19, 12 menos que'l llunes, a los qu'hai que sumar 134 que tán na UCI, 3 más.

22 biltos en residencies

La conseyería detectó ente'l 24 y el 30 de payares un total de 22 biltos en residencies de mayores, 6 menos que la selmana anterior. En total contabilizáronse 276 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como brotos cuando hai al menos trés. Nesi sen, nesti periodu confirmaróse casos n'otros 25 centros residenciales.