La Tarrancha zarra’l ciclu Glayíos/Oihuak xunto con Suaia eta Lahaine

Esti vienres va celebrase’l conciertu caberu del 2015 d’esta iniciativa qu’entama intercambios musicales ente Asturies y Euskal Herria. Nesta cita va amestase’l hip hop-reggae de Suaia eta Lahaine col mecigayu-ska de La Tarrancha.

Poro, los ritmos de raigañu xamaicanu van tener güecu mañana na cita prevista en La Calleja d’Uviéu pa les 22 hores. Nella La Tarrancha tendrá la oportunidá de presentar ente’l públicu uviedín el so trabayu últimu, ‘Elefantes na cacía’, discu nel que la banda nun pierde la so esencia fusión cola mezcla de músiques asturianes, ruses o soníos llatinos.

Como convidaos van tar Suaia eta Lahaine coles sos “rimes del pueblu pal pueblu”. Trátase del proyeutu conxuntu de Gorka Suaia, alter ego de Askapen Sound Systema, y Endika Lahaine, MC de la marxe izquierda del Nervión y militante en 121 Krew. Los vascos cuenten con un discu grabáu, ‘Herrima’, “una coctelera de hip hop, drum&bass, reggae..., cola pallabra como arma y la canción como argumentu”.

El preciu de la entrada pal conciertu ye de 5 euros anticipada y 8, na puerta, calteniendo l’espíritu col que nació Glayíos/Oihuak d'ufiertar música de calidá a precios afayadizos. Tamién esiste la posibilidá de mercar el ticket con un CD de cualquier de les dos formaciones pol 12 euros. Los puntos de venta anticipada son los siguientes: L'Esperteyu y Mimaría, n’Uviéu; Sidrería Canteli y Centru Social La Llume, en Xixón; El Cafetón, n’Avilés; Judá, en Siero; Ochobre, en L’Entregu; Matteria, en L’Entregu; y Café Habana, en Mieres.

Tres les actuaciones la folixa va continuar en La Calleja d’Uviéu cola Glayíos Antisystem Sound Selekters, conformáu por persones d’Ixuxú Asturies-Euskal Herria elkartea y del Colectivu Xuvenil Glayíos, entidaes que crearon la iniciativa Glayíos/Oihuak. Asina sonará drum&bass, soul, punk-folk, electroswing, jungle, hip hop, música balcánica, rock o ska, ente otros estilos

Nel 2016, n’Euskal Herria

A lo llargo del añu, sumando’l de mañana, Glayíos/Oihual entamó un total de cinco conciertos que permitieron al públicu asturianu conocer les propuestes musicales nueves que tán dando fuerte n’Euskal Herria. Asina, tres el conciertu inaugural de Skama la Rede y Skakeitan en xineru, llegaron los de Neña Coyote eta Chico Tornado y Sombra, el de Rat-Zinger y Skontra, y el de Gose y Fabes de Mayo, caún d’estilu musical concretu.

Pal añu qu’entra la idea de los organizadores ye dar continuidá a la esperiencia llevando bandes asturianes a Euskal Herria onde, gracies al trabayu d’Ixuxú Asturies-Euskal Herria elkartea, tán dándose a conocer ente’l públicu vascu.