La Tarrancha y Felpeyu van tar na VII Fiesta de les Asociaciones

La playa d’El Natahoyo va ser sede ente’l 14 y 17 de xunetu de la VII Fiesta de les Asociaciones, qu’esti añu adelántase pola celebración de la ‘Semana Negra’ en feches más tardíes. Nesta edición repiten actuación La Tarrancha y Felpeyu.
 
La banda de mecigayu-ska va tocar el xueves, nel primer día d’esti certame qu’entama’l Conseyu de la Mocedá de Xixón, a les 21 hores. Enantes, a les 18 hores, Carlos Alba ‘Cellero’ va facer el monólogu ‘La llei del cuchu’. Pela so parte, el grupu folk, que cumple 20 años n'ochobre, va xubise al escenariu’l sábadu a les 22 hores. Mentes, pa les 12.30 hores del meudía del domingu, ta previsto la celebración d’una muestra de xuegos tradicionales asturianos pola Escuela Tradicional La Quintana que va continuar, a les 13.30, col repartu de boños preñaos y sidra simulando una romería asturiana.
 
Talleres, charres, degustaciones gastronómiques y competiciones deportives de baloncestu 3 contra 3, fútbol-playa o balonmano-playa, son dalgunes de les otres activadaes que van poder disfrutar les persones que s’averen a la sablera d’El Natahoyo nestos cuatro díes nos que s’allarga la VII Fiesta de les Asociaciones.