La Tarrancha viaxa a Gasteiz pa participar nel Glayíos/Oihuak Fest

Tres un primer añu de conciertos n'Asturies de bandes asturianes y vasques, la iniciativa Glayíos/Oihuak pasa a afitase n'Euskal Herria. Esti sábadu La Tarrancha y Sombra viaxen a Gasteiz pa participar nel primer festival del ciclu d'intercambiu musical, que va completase con actividaes a lo llargo de tola xornada.

A les 7 hores va partir de L'Entregu un autocar pa desplazar a la xente asturiano interesao n'acudir al Glayíos/Oihuak Fest, con paraes n'Uviéu (7.20 hores) y Xixón (7.40 hores). El so preciu ye de 25 euros xunto cola entrada y la xinta, y mientres el día de güei entovía se pue garrar plaza nel Chigre Ochobre (L’Entregu), Matteria (La Felguera), L’Esperteyu y Llar La Llegra (Uviéu), y Sidrería Canteli y CS La Llume (Xixón).

A la llegada a Gasteiz, ta previstu a les 13 hores un pasucais per chigres animáu con gaita y trikitixa, pa celebrar la xinta popular a les 15 hores. Yá de tarde, va haber xuegos tradicionales asturianos y un mercadín de coleutivos.

Los conciertos nel Gasteizko Gaztetxean van principiar a les 19 hores y nellos van tar La Tarrancha –que'l vienres actúa en Torlavega xunto con Cambalua– y Sombra, amás de la cantautora Olatz Salvador y de Juantxo Skalari & La Rude Band, que va encargase de zarrar les actuaciones d'una folixa que va allargase de madrugada. Mientes tol Glayíos/Oihuak Fest los presentes van poder disfrutar de sidra ecolóxico L’Allume y cerveza artesano Caleya.

Pa la xente vasco o la que se desplace pela so cuenta dende Asturies, el preciu de los conciertos ye de 5 euros, cantidá qu'inclúi la entrega de baldre del recopilatoriu 'Glayíos/Oihuak 2015'. Mentes, la xinta popular tien un costu de 5 euros. Esta iniciativa ta entamada pola asociación d’asturianos emigraos Ixuxú Asturies-Euskal Herria elkartea.