La Tarrancha, que presenta videoclip, va dar el primer conciertu de la xira de los 20 años n'abril en Xixón

Esti 2023 La Tarrancha cumple 20 años y yá prepara la xira que lleva de nome ‘Venti’, que va abrir el 29 d’abril en Xixón. En payares celebró’l conciertu especial ‘Camín de Venti’ en La Pola (Ḷḷena), que se grabó pa una difusión próxima, imáxenes que s’aprovecharon pa la edición del videoclip ‘Tiempu de sidra y roses’ que la banda estrenó esti vienres.

Pocos díes depués de recibir l'AMAS na categoría ‘Direuto’, y en plena celebración poles dos décades na carretera, La Tarrancha da a conocer el so videoclip últimu. ‘Tiempu de sidra y roses’, cenciellu espublizáu l’añu pasáu, ye’l cantar escoyíu, tema que sigue l’estilu ‘mecigayuska’ carauterísticu d’esti grupu que nació de la xuntanza de Fai un Flai y Papá Pitufo/Zemba, nesti casu fusionando soníos punk con folk.

Na pieza audiovisual pueden vese imáxenes de l’actuación del 19 de payares del Teatru Vital Aza. Un conciertu especial nel qu’hebo delles collaboraciones, con presencia de vieyos miembros de la banda, y que quedó grabáu en videu y audiu.

A lo llargo del añu del aniversariu La Tarrancha va asoleyar dalgunos d’ellos y va grabar temes nuevos p’asoleyar como cenciellos, siempre, como vien faciendo dende l’entamu de la so carrera, baxu llicencia llibre Creative Commons. Tamién va xirar per dientro y fuera d’Asturies, con Xixón como primer parada: el 29 d’abril na sala Albéniz pol Primeru Mayu xunto con Ochobre y Escuela de Odio.