La Tarrancha presenta ‘Somos’, el primer cenciellu del so discu ‘Mezigayuska’

Los siguidores de La Tarrancha yá pueden sentir na rede ‘Somos’, el primer cenciellu del que va ser el segundu llarga duración de la banda fusión: ‘Mezigayuska’. Esti tema soprende pol so toque punk-folk y la carga de rabia que presenta.
 
‘Somos’ ye “un cantar a nós mesmos, los asturianos, y a lluchar; un cantar cargáu de rabia, pero tamién de sentimientu” que parte d’una base d’un cachu de la ‘Muñeira de Bargáz’, según esplica La Tarrancha. Amás sirve de presentación a un trabayu, ‘Mezigayuska’, que ye una evolución al soníu del grupu, con temes que toquen estilos distintos como’l punk-rock o los soníos balcánicos, llatinos o rusos. D’ehí el nome del discu, términu col que la banda define’l so estilu.
 
Esti llarga duración de La Tarrancha, compuestu por 12 cantares, grabóse nos Estudios TUTU de Corvera y trátase d’un discu autoproducíu que va llevar la llicencia semillibre Creative Commons, un formatu llegal fuera de l'entramáu de la SGAE. Esto permite que la música de la banda fusión pueda ser compartida de forma gratuita pela rede ensin nenguna torga llegal. Amás, supón un aliciente pa los promotores musicales, yá que nel casu de contratar a La Tarrancha nun han de pagar porcentaxe nengún a la SGAE.