La Tarrancha entra nel estudiu pa grabar ‘Mezigayuska’

Los músicos que conformen la banda fusión La Tarrancha yá tan trabayando no que va ser el so tercer trabayu d’estudiu. Ésti lleva’l nome de ‘Mezigayuska’, xuegu de pallabres col que definen el so estilu musical propiu.
 
Pa grabar esti discu, el segundu de llarga duración tres ‘Ö-3-3 (otres trés’) –enantes grabaron la maqueta ‘Qlt?’ –, La Tarrancha tornaron a escoyer los Tutu Estudios. En Corvera tán anguaño dando forma a doce cantares, “y dalguna sorpresa”, nos que partiendo del ska y del reggae toquen palos que van dende la música tradicional asturiana a soníos llatinos, rusos, balcánicos o d’estilu punk-rock. “Un conceutu musical ventureru, alloñáu de complexos y de convencionalismos comerciales”, espliquen dende la banda.
 
Fiel a la filosofía col que nació esta banda hai casi una década frutu de la fusión de Fai un Flai y Papá Pitufo/Zemba, ‘Mezigayska’ trátase d’un discu autoproducíu que va llevar la llicencia semillibre Creative Commons, un formatu fuera de la SGAE que permite que pueda ser compartíu pela rede de manera llegal. Según espliquen dende La Tarrancha, esti formatu tamién beneficia a los promotores de conciertos, yá que nun tienen qu’abonar canon nengún a la sociedá presidida anguaño por Anton Reixa. Nesi sen, la banda anuncia que yá tien abiertu’l periodu de contratación de cara a esti branu.