La Tarrancha dispón 'Elefantes na cacía' pa la so descarga de baldre

|

Trátase del quintu discu de la banda.

'Elefantes na cacía' ye un álbum ensin complexos, nos que La Tarrancha vuelve a tirar de cualquier estilu musical ensin mieu y con muncha más fuerza y enerxía que nos sos anteriores trabayos, una amuesa más de la so autodenomináu estilu mecigayuska. Supón tamién un trabayu bien esperáu yá que l'anterior 'Mezillingües' namás incluyía un tema nuevu; tolos demás yeren cantares yá grabaos pola banda pero de la voz de diecinueve collaboradores de distinta procedencia, en toles llingües de la península, un apueste nunca fechu hasta'l momentu y que col que llograron mui bon resultáu per parte del públicu.

Nel discu apréciense mas coqueteos coles distorsiones y toques duros, pero nun pierde la so esencia a base de ska entemecio con aires balcánicos, llatinos, temes tradionales asturianos, guiños punks o metaleros nunos momentos… paro tamién al swing, al reggae, al rap n'otros… En definitva, pa tolos gustos, o pa un públicu cada vez mas llibre de prexuicios y vidueñu de baillar. Y ye, que según esplica La Tarrancha, un poco la esencia del títulu ye precisamente eso: "faciendo referencia a parte d'una de les sos lletres, remémbranos al tracamundiu y a imaxinanos unos elefantes enredando ente los nuesos caciplos nuna fiesta doméstica pero totalmente indomesticable. Daqué según El Guateque de Blake Edwars, pero ensin Peter Sellers y nel contestu d'una Asturies Undeground totalmente abierta a influencies culturales esternes anque calteniendo simpre presente'l sabor autóctonu".

La banda compuso pa esti álbum cantares que falen del amor, de la fiesta, de la conciencia individual y colectivo, de llucha, de fiesta, d'allegría y de murnia; como la vida mesma, un cúmulu de toes eses coses que ye n'esencia de lo que tamos feches les persones. Depués d'unos conciertos de presentación esitosos, La Tarrancha prepara una xira pa esta primavera-branu mientres ún de los sos miembros recupera d'una intervención quirúrxica. A partir d'abril tarán, poro, de vuelta a los escenarios.

Como ye vezu, 'Elefantes na cacía', editóse baxo llicencia Creative Commons como parte de la so filosofía de La Tarrancha, que siempre pon a llibre disponsición del públicu la descarga de tolos sos trabayos. Los sos anteriores discos pueden esfrutase al traviés de Jamendo.

Pa descargar esti discu pue calcar equí.

Contador Estadistiques