La Tarrancha continúa cola xira de presentación del discu ‘Mezigayuska’ con un conciertu n’El Sabil

El chigre-agospiu rural El Sabil, en Santu Adrianu, va ser la parada próxima de La Tarrancha na xira de presentación del so trabayu ‘Mezigayuska’. El conciertu, de baldre, va celebrase’l sábadu a partir de les 23.30 hores.

Sicasí, la folixa va principiar un cachu enantes. El Sabil entama un pinchéu previu a l’actuación de la banda fusión en llingua asturiana, pa lo que ye necesario confirmar asistencia. Amás, l’establecimientu hosteleru da la posibilidá de facer nueche nel llugar por un preciu cercanu a los 20 euros, cena incluyida. Tres el conciertu, va abrise l’escenariu al públicu presente p’allargar la fiesta hasta bien entrada la madrugada.

‘Mezigayuska’ trátase d’un llarga duración compuestu por 12 cantares grabaos nos TUTU Estudios de Corvera. Esti trabayu, que yá ta a la venta, amuesa una evolución nel soníu del grupu, con temes que toquen estilos distintos como’l punk-rock o los soníos balcánicos, llatinos o rusos. D’ehí el nome del álbum, términu col que la banda define’l so estilu. El discu, autoproducíu, tien llicencia semillibre Creative Commons, un formatu llegal fuera de l'entramáu de la SGAE. Esto permite que la música de La Tarrancha pueda ser compartida de forma gratuita pela rede ensin nenguna torga llegal. Amás, supón un aliciente pa los promotores musicales, yá que nel casu de contratar a la banda nun han de pagar porcentaxe nengún a la SGAE.