La Tarrancha abre los conciertos de la VII Fiesta de les Asociaciones

El grupu de mecigayu-ska La Tarrancha abre esti xueves el ciclu de conciertos de la VII Fiesta de les Asociaciones. Per cuatro díes, la playa d’El Natahoyo va ser sede de charres, talleres, competiciones deportives y actuaciones musicales.
 
A les 17.30 hores va inaugurase de forma oficial esta iniciativa entamada pol Conseyu de Mocedá de Xixón y na que collabores dellos coleutivos. L’humor n’asturianu va ser l’encargáu d’abrir el ciclu d’actividaes alredor de les 18 hores, yá que Carlos Alba ‘Cellero’ va facer el so monólogu ‘La llei del cuchu’. Nun va ser l’únicu espaciu que va tener la llingua asturiana ente les actividaes programes pa güei: a les 21 hores, La Tarrancha va xubise sobre l’escenariu instaláu na esplanada de la sablera d’El Natahoyo pa facer baillar al personal.
 
Col conciertu d’esta nueche, esta banda formada por ocho músicos abre un ciclu d’actuaciones protagonizaes por grupos asturianos de toda triba que va allargase hasta’l domingu. El sábadu va ser el turnu del folk cola presencia d’una de les bandes asturianes de más prestixu internacional: Felpeyu. L’entamu del conciertu ta previsto pa les 22 hores.