La térmica d’Aboño y Arcelor-Mittal, entes les 100 plantes más contaminantes de la Xunión Europea

L’Axencia Europea del Mediu Ambiente dio a conocer un informe sobre’l costu de la contaminación industrial a los estaos miembros. Nella, inclúise un llistáu coles plantes más contaminantes, con dos asturianes ente les cien primeres.
 
Con datos relativos al añu 2009, atopamos nel númberu 70 d’esta llista que recueye a les 622 industries que contribúin al 75 por cientu de los costes de la contaminación na Xunión Europea a la Central Térmica d’Aboño, mentes que les factoríes avilesines y xixoneses d’Arcelor-Mittal ocupen la posición 89. Nun son les dos úniques plantes del Estáu situaes ente les 100 primeres, yá que la Central Térmica Litoral de Almería, en Carboneras, ta la 50, y la Unidad de Producción Térmica As Pontes, la 83. Mentes, la Central Térmica de Soto Ribera ocupa la posición 322. Encabecen esta rellación d’empreses contaminantes PGE Elektrownia Belchatów, asitiada en Rogowiec (Polonia); TETs Maritsa izkot 2º EAD, en Kovachevo (Bulgaria); y Vatenfall Europe Generation AG Kraftwerk Jänschwalde, en Peiz (Alemaña).
 
‘Revealing the costs of air polution from industries facilities in Europe’ ye’l nome d’esti informe asoleyáu pola Axencia Europea de Mediu Ambiente que revela que la contaminación industrial cuesta al Estáu ente 6.451 millones y 10.182 millones d'euros al añu en daños a la salú y el medioambiente. Nel conxuntu de la Xunió Europea, la contaminación atmosférica procedente de les 10.000 mayores plantes industriales en territoriu comunitariu cuesta ente 102.000 y 169.000 millones d'euros, esto ye, ente 200 y 330 euros por européu de media nel 2009. La metá d'esti costu cáusales les 191 instalaciones más contaminantes, principalmente productores de lletricidá. Hai que destacar que los costos calculáronse utilizando los datos d'emisiones entregaos poles mesmes plantes.
 
Alemaña, Polonia, Reinu Xuníu, Francia y Italia, onde s'alcuentra un mayor númberu plantes industriales grandes, son los países que más contribúin a estos daños. Sicasí, si se tien en cuenta la productividá, les emisiones de Bulgaria, Rumanía, Estonia, Polonia y República Checa resulten más importantes. Mentes, les emisiones de CO2 son les que más contribúin al costu total, aproximadamente 63.000 millones nel 2009. Otros contaminantes atmosféricos que favorecen la lluvia ácida y pueden provocar problemes respiratorios, como'l dióxidu d'azufre, l'amoniacu, les partícules y los óxidos de nitróxenu, causen un dañu mediu d'ente 38.000 y 105.000 millones d'euros al añu.