La sostenibilidá y l'equilibriu territorial, bases del plan turísticu pal añu 2018

El Gobiernu pretende favorecer una distribución de los visitantes de manera homoxénea per tol país.

El direutor xeneral de Comerciu y Turismu, Julio González Zapico, presentó ayeri en Valdés a los axentes del sector los planes de marketing diseñaos pol Gobiernu pa promocionar nel 2018 dellos productos prioritarios: naturaleza y turismu activu, turismu rural, cultura, ciudaes, caminos de Santiago, mariña y pueblos marineros, patrimoniu industrial y gastronomía asturiana. Estes árees temátiques coinciden colos oxetivos del Programa de Turismu Sostenible 2020, basaos na desestacionalización, la internacionalización y l'equilibriu territorial.

Coincidiendo cola celebración del Día Mundial del Turismu, Zapico sorrayó qu'esta propuesta inclúi los valores plantegaos pola Organización de les Naciones Xuníes cuando se declaró 2018 Añu Internacional del Turismu Sostenible. “N'Asturies, toda esta base ética convertímosla nun valor estratéxicu va poco más d'un añu, cuando presentamos el programa 2020”, destacó.

P’avanzar nos oxetivos consensuaos y aprobaos na mesa de concertación social, l'Executivu trabaya nel diseñu d'una política turística integral y tresversal que favoreza l'equilibriu ente les distintes zones d'Asturies. Los planes presentaos, que van esponese tamién n'otres cinco xuntes n'otros puntos del país, aspiren a incrementar y distribuyir los fluxos turísticos de manera homoxénea nel territoriu mientres tol añu, de forma que los más de 2.200 millones d'euros qu'añalmente dexen los visitantes n'Asturies repercutan en tolo territorios de manera equitativa.

Amás, Zapico destacó'l papel del turismu sostenible como instrumentu de desenvolvimientu que “favorez una meyor calidá de vida y fortalez la proteición del mediu ambiente y la defensa del patrimoniu cultural”. Nesi sen, apostó por un modelu que contribuya a xenerar “una crecedera económica inclusiva, crear empléu de calidá, arriquecer el mediu ambiente y caltener el patrimoniu material y inmaterial asturianu, asina como la so diversidá y la so identidá”.

Na semeya: Playa de Gulpiyuri (Llanes)