La sociedá movilízase un añu más contra les violencies machistes

Esti llunes, 25-P, ye'l Día Internacional de Desaniciu de la Violencia contra la Muyer. El Movimientu Feminista d'Asturies convoca una manifestación esta tarde en Xixón.

'Poles que tamos, les que nun tamos, les que peligramos' ye'l lema de la marcha con salida nel Paséu de Begoña a les 19.30 hores, onde va haber una concentración dende les 19 hores al altor del quioscu música. Va ser l'actu central d'una xornada centrada en denunciar les violencies machistes, completando asina les numberoses iniciatives nacíes dende dellos coleutivos y les instituciones per toda Asturies a lo llargo de güei y nos díes previos.

Naciones Xuníes vien conmemorando esta xornada dende'l 1981, que recuerda l'asesinatu de trés hermanes, les Mirabal, activistes polítiques, en República Dominicana nel 1960 pol réxime de Trujillo. Esti añu pretende pintar el mundu de naranxa contra les violaciones a muyeres y neñes.