La situación d’Europa en tiempos del Reinu d’Asturies, temática d’una conferencia científica internacional

|
La situación d’Europa en tiempos del Reinu d’Asturies, temática d’una conferencia científica internacional

‘El Reinu d'Asturies y Europa: sieglos VIII y IX. Contestu históricu del so orixe y desarrollu’ ye’l nome de la conferencia científica internacional que va celebrase n’Uviéu del 2 al 5 d’ochobre, con una ponencia final en Cuadonga. Trátase d’un de los eventos más destacaos del programa cultural ‘Cuadonga Centenarios’.

L'oxetu esencial del alcuentru ye amosar una panorámica rigorosa que dexe contestualizar dende diversos puntos de vista'l momentu de la nacencia del Reinu d'Asturies dientro de la realidá europea y mediterránea de la dómina. La conferencia científica, que va tener llugar principalmente nel Eurostars Hotel de la Reconquista, va encarar aspeutos decisivos de la realidá de la Península Ibérica, del occidente cristianu y del oriente mediterraneu nos sieglos VIII y IX.

Les ponencies van incidir nuna perspeutiva comparativa sobre ámbitos históricos como la política, la xestión territorial, la implantación eclesiástica o les rellaciones culturales, y van tar protagonizaes por especialistes de les universidaes de París, Pàdoa, Alcalá de Henares, Jaén, Euskadi, Uviéu, Lisboa, Roma, Madrid y Corcaigh, la Escuela Superior de Diplomática, del Vaticanæ o’l Max-Planck-Institut für Europäische Rechtsgeschichte de Frankfurt. La conferencia va zarrase en Cuadonga'l vienres 5 con una ponencia de Vidal de la Madrid, de la Universidá d'Uviéu, entitulada ‘El santuariu de Cuadonga. Arquitectura y imaxe dende la Edá Media’.

La inscripción pa ‘El Reinu d'Asturies y Europa: sieglos VIII y IX. Contestu históricu del so orixe y desenvolvimientu’ ye de baldre y pue certificase nel corréu electrónicu dgpatrimoniocultural@asturias.org.

Na semeya, Otilia Requejo, direutora xeneral de Patrimoniu Cultural, y De la Madrid.

Contador Estadistiques