La situación del idioma nos servicios públicos y nos conteníos pa formatos nuevos interesa en Catalunya

La Federal Union of European Nationalities (FUEN) celebró n’Altafulla’l grupu de trabayu Non-Kin State de naciones y minoríes ensin estáu, con Plataforma per la Llengua como anfitriona. La temática principal foi la presencia de les llingües nos servicios públicos y los conteníos pa nueves tecnoloxíes, y Iniciativa pol Asturianu acudió como convidada pa presentar la realidá asturiana.

“FUEN ye la principal rede defensora de los grupos llingüísticos autóctonos d'Europa, y arrexunta a más de 100 organizaciones de 36 estaos europeos”, presenta’l coleutivu asturiana a esta organización nacida nel “1949 en Versalles pa dar un papel dignu a les distintes naciones y minoríes dempués de la Segunda Guerra Mundial” que “últimamente coordinó iniciatives como'l Minority Safepack, una iniciativa lexislativa a escala europea para ameyorar la protección de les llingües non oficiales de la Unión Europea”.

Anguaño la Xunión Federal de Nacionalidaes Europees “ye la voz de les minoríes étniques, llingüístiques y relixoses n'organizaciones internacionales como la Organización para la Seguridá y la Cooperación n'Europa (OSCE) o la Organización de les Naciones Xuníes, na que tien un estatus consultivu. Amás, la entidá tien un papel participativu na Unión Europea y nel Conseyu d'Europa”.

El xueves y el vienres el so grupu de trabayu Non-Kin State de naciones y minoríes ensin estáu, qu’integren 29 organizaciones de 15 territorios diferentes que representen a minoríes culturales, llingüístiques, étniques y relixoses, aconceyó en Tarragona, en concreto na población d’Altafulla. La Plataforma per la Llengua organizó l’eventu, de calter priváu, que se centró na presencia de les llingües minorizaes nos servicios públicos y los conteníos culturales pa nueves tecnoloxíes nestos idiomes.

Participación d'Alma Hidalgo

Los asistentes pudieron conocer la situación asturiana gracies a la presencia d’Iniciativa pol Asturianu, convidada pa esta xunta de trabayu de la rede. Alma Hidalgo, direutiva de la organización, desplazóse a Catalunya pa facer dos intervenciones, que centró nos servicios esistentes n'asturianu y la capacitación llingüística de los funcionarios, y la creación y consumu n’asturianu en formatos como YouTube, TikTok o redes sociales.

“L’activista recalcó que l’asturianu ye una llingua que ta viva y que tien que futuru per delantre pero que precisa d’algamar l’estatus de reconocimientu d’oficialidá nel Estatutu d’Autonomía pa garantizar el so futuru y la igualdá de drechos ente tolos y toles ciudadanes. Tamién apuntó que les tecnoloxíes nueves “son una ferramienta tamién pa espardir l’idioma y de llegar a nueves xeneraciones, cuntando con bonos conteníos na llingua propia, y resaltó la importancia de la presencia de la llingua asturiana nos medios de comunicación públicos”.

Amás de presencia de minoríes del Estáu, acudieron a Altafulla entidaes representantes de los macedoromanesos de Bulgaria, Albania y Rumania; los lladinos d’Italia; los pomacos de Grecia; los sorabos y frisones d'Alemaña; los lezguinos y mesxetos de Rusia; y los xitanos de Macedonia del Norte.

Na semeya, Hidalgo nuna de les sos intervenciones.