La situación de la variante de Payares ye "desoladora" según Belén Fernández

La conseyera d'Infraestructures asegura que'l ministeriu carez de plazos y soluciones.

Belén Fernández González caltuvo'l xueves un alcuentru en Madrid col secretariu d'Estáu d'Infraestructures, Julio Gómez-Pomar, tres la qu'aseguró que'l Ministeriu de Fomentu nun remana plazos nin soluciones pa los numberosos defectos y erros que tienen práuticamente paralizaes les obres de la variante ferroviaria de Payares, de la que’l Gobiernu d'España nun tien siquiera feches estimativas pa la so conclusión. Calificó tamién la situación de "desoladora", yá que, magar los numberosos frentes abiertos, la obra ta práuticamente paralizada y la única actividá ye la retirada de tierra de los argayos qu'afeuten a la fastera furada al altor de Sotieḷḷo.

La titular tamién d'Ordenación del Territoriu y Mediu Ambiente aseguró tamién que, acordies cola información suministrada por Fomentu, nun hai perspeutives d'axudicar contratu dalgún a curtiu plazu, nin compromisos de finalización de la obra, o siquier de dalgún tramu entemediu. Una situación, señaló, que provoca gran esmolición nel Gobiernu pola falta de voluntá política del Executivu central con una infraestructura estratéxica pal país.

D'igual forma, apuntó qu'un plazu "realista” y “hasta xenerosu” a la vista del estáu de la obra sería que la variante entrara en serviciu nel 2017. Nesis sen, recuerda que'l compromisu de la ministra Ana Pastor y el xefe del Executivu estatal Mariano Rajoy, en sede parllamentaria, yera que les obres taríen terminaes primero nel 2014 y, darréu, nel 2015. “Entendemos que con presupuestu y voluntá política podría ser una realidá, pero nun ta nel ánimu del ministeriu trabayar nesa direición”, atayó.