La sidra protagoniza la charra mensual d'Ástura

L'asociación quier sofitar la candidatura de la cultura sidrera asturiana a patrimoniu inmaterial y pa ello convida a Eduardo V. Coto a falar sobre la nuesa bébora nel esterior.

'La sidra más salvaxe del mundu nel contestu internacional (Vivencies d’un guerrilleru sidreru)' ye l'espresivu nome de la charra que se va celebrar mañana nel llar del Atenéu Obreru de Xixón. "Vamos falar na conferencia de marzu d’un análisis, d’una estratexa y de cómo desendolcala pa ser quien a tornar la situación", en referencia al pocu reconocimientu esistente fuera d'Asturies del nuesu productu hasta nun hai muncho, inclusive n'otros países sidreros, dalgo que nun asocedía col vascu, "y en pocos años poner la nuestra sidra onde amerita tar nel contestu internacional", espliquen dende Ástura.

Amás, esti entamador y promotor sidreru va tratar tamién, "como gran especialista n’otres mui estremaes producciones sidreres y na so comercialización", sobre "lo que se cuez n’otros países al rodiu la sidra y de los proyeutos que tan desendolcándose perende". Por último, va conseñar, asina mesmo, "cuálu pue ser el futuru de la nuesa sidra y del conceutu global d’esta bébora nel futuru".

Comienzu más tarde de lo habitual

La conferencia sobre cultura asturiana d'esti mes va retrasase media hora sobre l'horariu habitual, polo que va comenzar a les 20 hores. La razón ye la inauguración oficial a les 19.30 hores nel Centru de Cultura Antiguu Institutu de la esposición 'Patria de sidra', sobre la industria de la sidra axampanao nel país dende'l 1894 al 1936.

Pintures, cartelos, etiquetes y folletos van poder vese nesta amuesa que va tar abierta al públicu hasta'l 23 de xunu na sala 2 del edificiu nel horariu siguiente: de 18 a 21, de llunes a vienres; de 11 a 14 y de 18 a 21, los sábados; de 11 a 14, los domingos y festivos d'apertura.