La Sidra entama una tastia de sidre monovarietal vasco y asturiano

|

L'Ayalga va acoyer esti sábadu una tastia de sidre monovarietal vasco y asturiano qu'entama la revista La Sidra. Estes bébores van acompañase de quesos de cabra y oveya de los llaniscos Bedón.

Na sede de la espublización, asitiada na xixonesa cai Decanu Prendes Pando, van poder prebase dos sidres monovarietales del programa d'investigación lleváu alantre pola Gipuzkoako Sagardogileen Elkartea en collaboración cola Euskal Herriko Unibertsitatea, cortesía del asesor enolóxicu Juan Zuriarrain, feches de mazana Gezamina y Urtebi Txiki, de manera respeutiva. Completen la tastia les asturianes Villacubera d'espresión nueva, de Cortina con variedá Regona, y otra esperimental d'un llagar del país. Según espliquen los organizadores, esta cita "trátase d'una oportunidá única pa conocer de primer man los resultaos y les posibilidaes qu'ufierta la sidre monovarietal".

Los interesaos en participar han d'inscribise nel corréu electrónicu info@lasidra.as o nel teléfonu 652.594.983. El preciu de la tastia, que va principiar a les 12.30 hores, ye de 10 euros pal públicu y de 6 pa soscriptores y collaboradores. Les places tán llendaes por motivos d'espaciu.

Contador Estadistiques